Ий гыч ийыш Йошкар-Олаште Чарла кремльыште «Угинде» пайрем эртаралтеш. Тыште кажне район шке чолгалыкшым ончыкта.
А ты ийын «Угинде» фестивальыште Морко кундемнан чапшым Кораксола тӱвыра пӧрт пеленысе «Муро кумыл» ансамбль арален. Ансамбльнан чолга мурызыжо-влак кокла гыч Светлана Соколова пайремлан поснак чот ямдылалтын. Киндын чапшым мокташ эн пушкыдо да тамле киндым лӱмынак кӱэштын. Светлана Георгиевна киндын рецептшым тыге сайын каласкален пуыш, калык шке кидсовышыж дене эн шокшын аклыш. Шижалтеш: чолга озавате шке пашашкыже йоча жапшын эн шерге татшым пыштен, вет тунам кочкашат шагалрак лийын, тудо жапыште илыше кажне еҥлан кинде эн тамле кочкышлан шотлалтын, а ньогалан поснак. Светлана Георгиевна «Угинде» пайремыш тӱрлӧ марий кочкышым ыштен намиен: кинде, перемеч, туара, полан когыльо да тулеч молат. А Татьяна Эманова мелна ден подкогыльым ыштен. Ансамбльнан моло участникше-влак «Кинде» муро дене фестивальым почыныт. Шке шочмо Морко кундем нергенат сылне мурым йоҥгалтареныт.
«Угинде» фестивальыште кажне район киндын чапшым моктен. Пушкыдо киндын ӱстембаке толын шумешкыже могай кужу корным эртымыж дене палдараш чыла арверым намиеныт. А Морко кундем гыч мийыше «Муро кумыл» ансамбльлан ожнысо сурт кӧргыштӧ пайдаланыме арвер-влакым верешташ Кугу Кожлаялын ончылъеҥже А.В.Багаев кугу надырым пыштен. Альберт Васильевичым ме шукертак сайын палена, тудын шуктен шогымо суапле пашажым аклена. Икмыняр тылзе ончыч Кугу Кожлаялыште лач тудын тыршымыжлан кӧра Кугу Ачамланде сарыште вуйыштым пыштыше салтак-влаклан пӧлеклалтше чап оҥам почмо. Галина ден Альберт Багаевмытак октябрь тӱҥалтышыште шке шочмо кундемысе илалше-влаклан пеш кугу пайремым эртарышт.
Тиде еҥын тыршымыж денак Кугу Кожлаял, Изи Кожлаял да Панайке кундемыште пӱя ачалалтеш, кажне уремыште лаке-влак тыгыде кӱ дене леведалтыт. «Угинде» фестивальыштат Морко районын чапшым аралаш Альберт Васильевичынак надырже эн кугу лийын.
Тек ончыкшымат мемнан Морко кундемна тыгай чолга шочшыжо-влак дене кугешнен ила. Вет кажне вершӧр шке калыкшылан тауштен гына тӱзлана да пеледалтеш.
Елена Григорьева, Кораксола тӱвыра пӧрт вуйлатыше.
Снимкылаште: Йошкар-Ола кремльыште «Угинде» пайремыште «Муро кумыл» ансамбль.