Морко районысо рӱдӧ эмлымверын ӱдырамаш-влаклан консультаций кабинетшым медоборудований дене пойдарыме. Тидым «Семья» нацпроектын «Охрана материнства и детства» регионысо проектше почеш ыштыме.
– 5-6 ий ончыч тыште капитальный ремонтым ыштеныт: кӱварым, омса-влакым вашталтеныт, тулвоштырым уэмденыт, пырдыжым тӧрлен чиялтеныт. Тений нацпроектлан келшышын, у оборудованийым налыныт: кардиологический монитор-влакым, кольпоскопым, ультрафиолет облучательым, электрокардиограф-влакым, ультразвук визуализацийлан датчик-шамычым, компьтер ден светильник-влакым, гинекологический креслым. Мебельымат наледыме: эмлан шкаф, ӱстел-шамычым, ширме ден мединструментлан тележке-влакым да молымат. Чылаже 11,7 миллион наре теҥге каен. Районышто илыше 25 тӱжем наре еҥ кокла гыч пелыже наре – ӱдырамаш-влак, йочам ыштен кертше ийготанже – вич тӱжем наре еҥ. Ынде пациент-шамычлан веле огыл, медпашаеҥ-влакланат йӧнанрак лийын, – ойла Морко районысо рӱдӧ эмлымверын акушер-гинекологшо А.В.Ростиславин.
Александр Васильевич Моркыш пашам ышташ 2015 ийыште толын. Тылеч ончыч Забайкальеште тыршен.
44 ий паша опытан акушерке Н.Варсонофьеван палдарымыж почеш, кыдалаш медпашаеҥ-шамычат кугу опытан улыт. Садлан самырык-шамычым эмлымверыште уло кумылын вучат.
Тений тыгак Красногорский врачебный амбулаторийыште, Советский, Марий Турек, Шернур, районласе рӱдӧ эмлымверлаште ӱдырамаш консультацийым почаш да Звенигово районысо рӱдӧ эмлымверыште модульный ӱдырамаш консультацийым чоҥаш тӱҥалаш палемдыме. А 2025-2027 ийлаште Йошкар-Оласе Перинатальный рӱдерыште оборудованийым уэмдаш да республикысе районлаште ӱдырамаш консультаций-влакым почаш 534 млн наре теҥгем ойырышаш улыт.
Марий Элысе Тазалык аралтыш министерствын сайтше гыч налме фото.