Моркышто «Морко ӱдыр – чолга шӱдыр» моторлык да мастарлык конкурс 4-ше гана эртаралте. Тений тудо Морко районын 100 ияш лӱмгечыжлан да Марий Эл Республикын кечыжлан пӧлеклалтын.
Ты гана 16-27 ияш 11 участник ушнен. Тӱҥалтышыште вӱдышӧ Е.Губернов ончаш толшо-влак дечын йодо: «Кӧ эн мотор, чолга?» Нуно чылан марла вашештышт: «Марий ӱдыр, Морко марий ӱдыр».
Ӱдыр-влак марла мутланен колтымышт, сӧрал марий вургемым ик гана веле огыл вашталтен чийымышт, шкем тӱрлӧ семын тергымышт дене программым пойдарышт. А этноконкурс-влак тыгай лийыныт: «Морко ӱдыр – ушан ӱдыр», «Морко ӱдыр – пашаче ӱдыр», «Морко ӱдыр – койшан ӱдыр», «Морко ӱдыр – мотор ӱдыр», «Морко ӱдыр – чолга ӱдыр».
Жюри (чылан пӧръеҥ-влак лийыныт) кыртмен пашам ыштен, тиде:
— жюри вуйлатыше – Сергей Валлерианович Галкин, Морко районысо администраций пелен пого паша шотышто пӧлка вуйлатыше;
-Сергей Леонидович Николаев, Шале ял шотан илем администраций вуйлатыше;
-Валентин Изосимович Кириллов, Янситово тӱҥ школым вуйлатыше;
-Алексей Вениаминович Степанов, Морко районысо йоча сымыктыш школым вуйлатыш;
-Владимир Васильевич Иванов, Морко 2-шо кыдалаш школын туныктышыжо.
Кажне этноконкурсышто таҥасыше ӱдыр-влак шкеныштым муаш тыршеныт, чолга марий ӱдыр улмыштым кӱлынак ончыктеныт, иктат ӧрын шоген огыл, сайын ямдылалтыныт.
Жюри конкурсант-влаклан кажныжлан лӱмым ойырен пуэн. Теве нуно:
— «Морко ӱдыр – шыма ӱдыр» – Кугу Шале ял гыч, Йошкар-Олаште кӱшыл образованийлан тунемше Валерия Григорьева,
— «Морко ӱдыр – лӱддымӧ ӱдыр» – Кӱчыкэҥер кундем гыч Коркатово лицейыште тунемше Дарья Архипова,
— «Морко ӱдыр – чулым ӱдыр» – Шеҥше селаште кевытчылан пашам ыштыше Яна Ямнеева,
— «Морко ӱдыр – весела ӱдыр» – Тойметсола ялыште илыше, туныктымо паша пӧлкаште пашам ыштыше Ксения Резвых,
— «Морко ӱдыр – ушан ӱдыр» – Кораксола кундем ӱдыр, Радиомеханический техникумын студенткыже Анастасия Михайлова,
— «Морко ӱдыр – кумылзак ӱдыр» – Морко гыч, Палантай лӱмеш тӱвыра да сымыктыш колледжын студенткыже Дарья Юрьева,
— «Морко ӱдыр – пашаче ӱдыр» – Унчо вел Шлань ялын ӱдыржӧ, тренерлан пашам ыштыше Марина Жолобова,
— «Морко ӱдыр – мотор ӱдыр» – Ӱшӱттӱр ялыште шочын-кушшо, Палантай лӱмеш тӱвыра да сымыктыш колледжын студенткыже Ольга Петрова,
— «Морко ӱдыр – койшан ӱдыр» – Арын кыдалаш школын туныктышыжо Ксения Иванова,
— «Морко ӱдыр – сылне ӱдыр» – Изи-Кушна ял гыч, Палантай лӱмеш тувыра да сымыктыш колледжын студенткыже Лиана Кудряшова,
— эн тӱҥ сеҥыше «Морко ӱдыр – чолга шӱдыр» – Морко гыч, 1-ше №-ан кыдалаш школын тунемшыже Ксения Дмитриева (вуйлатышыже – Туныктымо пашан калык туныктышыжо С.В.Никитина).
Вконтакте соцкылыште эн шуко, 1120 еҥ, Дарья Юрьева верч йӱклен.
Чыла конкурсантлан спонсор-влакын (Морко РайПО вуйлатыше Ильшат Ревович Файсханов да кинде комбинат вуйлатыше Сергей Александрович Макаров, ИП Ильина Лариса Витальевна, ИП Пашканова Надежда Валерьевна, Морко районысо тӱвыра, спорт да туризм пӧлка вуйлатыше Марина Валерьевна Осипова да Морко рӱдераҥдыме клуб системе вуйлатыше В.А.Дмитриев) полшымышт дене пӧлекым, сертификатым, дипломым кучыктымо.
Кодшо, III тыгаяк конкурсын сеҥышыже, Шеҥше селан ӱдыржӧ Лиана Ямнеева тенийысе сеҥыше Ксения Дмитриевалан тӱрлеман вуйпидышым чиктен.
Мый, проектын авторжо, вуйын шогышо айдеме, чылалан пеш кугу таум ойлем. Ӱшанена, марий ӱдырын – Морко ӱдырын сынже, койышыжо, шке йылме дене мутланен колтымыжо нигунамат ок йом.
Л.Ф.Кириллова, Морко рӱдераҥдыме клуб системе вуйлатышын алмаштышыже.
