Марий митрополий пелен Кусарыше комиссий уло, тудо книгам марлашке кусарыме, тылзе еда «Шӱм-чон изолык» газетым лукмо пашалан вуйын шога. Кызыт тыште марлаҥдыме Тошто Сугыньым (Ветхий Заветым) тергат, редактироватлат.
Комиссийын еҥже-влак тӱҥ шотышто Йошкар-Олаште тылзеш икмыняр гана чумыргат. А тиде арнян Морко поселкышто Юмын кончымо черке пелен кум кече пашам ыштеныт. Комиссийым Морко районысо Арын черкын настоятельже Николай ача вуйлата. Тудлан ты районысак Шеҥше селасе черке гыч Евгений ача, Волжский районысо Сотнур гыч Игорь ача, Йошкар-Ола гыч Лариса Орзаева полшеныт. Порын вашлийын, пашам ворандараш сай йӧным ыштымылан Кусарыше комиссийын еҥже-влак Морко черкын настоятельже Леонтий ачалан, тысе пашаеҥ-влаклан тауштат.