Марий калык таза, ӱнаран лияш манын, мончаште выньык дене кыралтеш. Тидлан кӧра тӱрлӧ пушеҥгын укшыжым кеҥежым поген ямдыла, выньыкым пидеш. Лудшына-влак тидын шотышто мом ойлат?
Надежда Сидыганова, Йошкар-Ола:
– Изинек ачам ден авам мончаште чыла чер пыта манын ойлат ыле. Тыге арнялан ик гана мончаш пураш тунемалтын. Южгунам выньыкым налына, южгунам шке ыштена. Кажне кеҥежым ешем дене пырля чодыраш куэ, писте, пызле, лӱмегож укшым погаш коштына. Тиде сомылым 14 июнь гыч 14 июль марте шуктена.