«Ондак пелашем дене ваш умылен, икте-весым пагален, аклен иленна. Кызыт чылажат вашталтын. Амал деч посна вурседылына, нимо уке гыч пелашемлан сырен кертам. Кузе лияш? Але вара тетла нигузе ондаксым пӧртылташ огеш лий?»
Вашмутым педагог-психолог, арт-терапевт Ольга МАКАРОВА пуа:
– Вате-марий коклаште «нойымаш» шижалтеш. Но тиде мужырлан ойырлаш кӱлмым огеш ончыкто. Икымше, мом ыштыман: посна каныман. Йолташ ӱдыр-влак дене вашлийза, кевытлаш миен толза але ялыш кайыза. Посна канымеке, уш яндарештеш, шонымаш вашталтеш. Тунам кокымшо ошкылым ышташ лиеш: еш илышда нерген шоналтыза, радамлен лекса.
Психолог-влак ойлат: вурседылмаш – шоныде йӧратымашым йодмаш. Тыгай годым кагазыш кок велым пелаш деч мом вучымыдам да мом тудо ышта, возыза. Вара лончылен лектын, кушто да мом ышташ лиеш, шоналтыза. Пырля шинчын, чон почын ваш мутланыза, ситыдымаш-влакым кораҥдыза.