Мом пӧлеклаш?

Коваште дене ыштыме арверым налаш ида вашке. Ӱдырамаш-влаклан фарфор ате-ӱзгарым, ӱстембалшовычым, вакшлан шартышым да тулеч молымат пӧлеклаш лиеш. А пӧръеҥлан мом пӧлеклыман? Тиде йодышым шкаланже, очыни, кажне ӱдырамаш пуа. Мутат уке, йӧратыме еҥлан ме ойыртемалтше пӧлекым кучыктынена, но шукыж годым пондашым нӱжаш пеным я дезодорантым, а южгунам носким пӧлеклена.

Пӧлекым ойырымо годым шотыш налза:

Пырля кучылташ йӧрышӧ арверым ида кычал, тудым те ешлан налыда, а пӧлек лач пелашланда гына лийже.

Пытартыш жапыште пелашда мом налаш кӱлмӧ нерген ойлен? Шарналтыза.

Каныме жапыште мом ышташ йӧрата? Ала иктаж хоббиже уло? Мом налаш манын кокытеланеда гын, йолташыже-влак дене каҥашыза.

Шке кид дене ыштыме пӧлеклан кажне айдеме куана. Пидын моштеда гын, шокшо свитерым але шарфым пӧлеклыза, тидлан жап уке гын, изирак открыткым ыштыза.

Пӧлек эшеат чот куандарыже манын, вӱдылкажымат ойыртемалтшым ямдылыза. А тудым шке кидда денат ыштен кертыда.

Иктаж кугурак арверым налмыда годым кӱрен тӱсан пеҥгыде кагазым вигак луктын кышкаш ида тырше. Тудым кучылтын (тыглай газетат йӧра), мотор вӱдылкам ышташ лиеш. Тыгодым тӱҥ элемент мотор бант, кӱжгӧ вынер мешак, кож укш але пӱгыльмӧ-влак лийыт.