Моло деч утларак ышташ тырше

Father and Son

Илышым палыше еҥын ойжо шергакан. Кузе шонеда, кугыеҥ самырыкше годым шкеж дене шке мутланен кертеш гын, могай каҥашым шкаланже темла але мо деч шекланаш йодеш ыле? Нине ой-каҥаш-влак самырык-влаклан пайдале лийыт.

Илышыште тӱрлӧ арвер огыл, а ушеш кодшо, оҥай тат-влак утларак лийышт. Шукыж годым еҥ-влак поян арвер, чапле вургем, у гаджет нерген шонат. Но ӧрыктарыше да сылне верлаш миен коштмо, оҥай еҥ-влак дене палыме лийме, приключенийыш логалме шарнымаш-влак эн шерге кодыт.

Илышым изишак койдарчык семын ончо. Нелылык лектеш гын, утыждене тургыжланаш огеш кӱл. Тушечат шкан пайдам налын кертат, вет тудат молан-гынат туныкта.

Яндар шӱм-чонан лий. Шуко ум пален налаш, улан тунемаш, у еҥ-влак дене палыме лияш тырше, шымле. Тунам ончылнет чыла корно почылтеш.

Шке шонымашет эре лийже. Еҥ-влак шке шонымыштым, кумылыштым виешак тушкаш йӧратат. Шке кумылетым шукто. Чылашт почеш каяш тыршыман огыл. Кажне еҥын шке илыш корныжо.

Еҥ-влак илышышкет толыт да каят. Южо еҥ дене ӱмыргорнын ик ужашыжым гына пырля ошкылаш логалеш. Кыл пужла, икымше йӧратымашат эре ӱмыр мучкылан огыл. Тӱҥжӧ палыман: нуно тыйым молан-гынат сайлан туныктышаш улыт. Но вашлият тугай еҥ-влакымат, кӧмыт ӱмырешлан пеленет кодыт. Нуным акле.

Окса почеш ит куржтал, а шкеже вияҥ, куш, шуаралт, ончыкылык нерген шоно. Пояш тӧчымӧ тӱҥ огыл, тыге оптышыш верешташ лиеш. Илышыште шке верым муаш кӱлеш. Ужмышудымо огыл, а чонетлан келшыше пашат лийже. Ешартыш шинчымашым нал, шкендым тӱрлӧ велым шуаре. Тыгодым канашат жапым му.

Сайрак лияш тырше, чотрак пашам ыште. Ит чоялане, нимом айда-лийже ит ыште. Пашаште, йӧратымаште, келшымаште да илышыште чылажымат 100 процентлан сайын ышташ тыршыман. Моло деч изиш утларакат ышташ тӧчӧ. Тиддене моло деч ойыртемалтат да сайрак лият.

Тачысе кечылан куане. Еҥ-влак эре ала-мом вучен илат: школым тунем пытараш, кӱшыл образованийым налаш, отпускыш лекташ, пенсий марте шуаш. Сита вучаш. Кажне изи татлан куанен иле, тачысе кече деч шукырак налаш тырше. Келшымашым, йӧратымашым, лишыл еҥет-влакым арале.

Илышым арам илен ит эртаре. Мо шотышто ӧкынат шоҥгыеҥ-влак? Мутлан, ӱмыр мучко йӧратыдыме пашам ыштеныт. Лишыл еҥ-влаклан жапым шагал ойыреныт. Шке тӱжвал сын, тазалык нерген шонен огытыл. Тӱням ужын шуктен огытыл.