Молитва полшен

Ты историйым авам каласкален. 1975 ий, авам тунам 10 ияш лийын. Ковам дене коктын ялыште иленыт, авамын ачаже ковам мӱшкыраным коден каен улмаш. Ковам фермыш коштын, сӧснам ончен. Сӧснан игым ыштымыж годым ковамлан йӱд сменыш кошташ пернен.

Ик тыгай йӱдым авам пӧртыштӧ шкетын кодын. Мӧҥгылан пуымо пашам ыштымеке, школлан мо кӱлешым ямдылымеке, ӱдыр пӧрт омсам тӱкылен да малаш возын.

Йӱдым тудо трукышто помыжалтын. Шинчажым почын да тылзе волгыдан пӧлемыште шке аважым ужын. Ӱдырамаш воштончыш ваштареш пӱкеныште шинчен да ӱпшым шерын. Вачыштыже – йӧратыме канде тӱсан шовычшо. Ӱдыр «авай» манын пелештынеже улмаш да тунамак пӧрт омсам тӱкылымыж нерген шарналтен. Аваже пӧртыш нигузе пурен кертын огылыс! Ӱдырамашым тӱткынрак ончалын – кидше нугыдо шем пунан. «Уке, тиде авам огыл» манын шоналтен. Лӱдмыж дене кычкырал колташ огыл манын, тудо одеялым пеҥгыдын пурлын. Воштончышко ончалын да аважын чурийжым ужын. Но тудын шинчаже пундашдыме, шеме, осал. Воштончышышто шинчаваш лиймеке, саде ӱдырамаш эркын гына койко дек савырнен. Нимом ышташ ӧрын, икшыве вуйге одеял йымак шылын да палыме молитвам лудаш тӱҥалын. Тылеч вара тудо койко воктене кугун шӱлалтыме йӱкым гына колын, тунамак окна янда чытырналтын, да окна могырым тале мардеж пуалын. Йӱк шыпланымекат, ӱдыр одеял йымач лекташ тоштын огыл. Мыняр жап тыге кийымыжым тудо ок шарне, жапын-жапын нералтенат колтен. Окна яндам пералтыме йӱкеш гына помыжалтме гай лийын – аваже йӱд смене гыч толын.

Ӱдыр одеял йымач лектын. Пӧрт омса тӱкылымӧ. Ик окна виш лийын, а кастене ӱдыр окнам петырен.

Йӱдымсӧ томаша нерген аважлан каласкален. Тудыжо ӱдыржылан ӱшанен. «Тиде осал вий тый декет толын. Жапыштыже молитвам лудаш тӱҥалынат, чын ыштенат», – манын йочажлан.

Тылеч вара авам йӱдлан шкетын пӧртыштӧ кодаш лӱдын. Аважын йӱд сменыж годым пашашкыже пырля каен, тушто мален. Ик ий гыч авам ден ковам тиде пӧртым ужаленыт. Нунын деч вара илыше-шамычат ӱшанаш лийдыме случай-влак нерген каласкаленыт.

Наталья.

Звенигово район.

Интернет гыч налме фото.