Тиде да икмыняр моло йодышлан вашмутым кодшо арнян исполнительный ден законодательный кучемын да Молодёжный парламентын еҥышт, тыгак пашам ыштыше самырык тукым пуэн. «Молодёжный парламент: перезагрузка» форсайт-сессий манме мероприятий Мер полыш штабыште эртаралтын.
Марий Элысе Молодёжный парламентым ыштымылан тений декабрьыште 15 ий темеш. Тудо кучем ден самырык-влак коклаште вашкылым ыштен. А теве кызыт Кугыжаныш Погынын 3 декабрьыште лийше сессийыштыже пеҥгыдемдыме почеш парламентын еҥже-влак тӱрлӧ йодыш дене шке законодательный инициативыштым темлен кертыт.
Форсайт-сессий
Тышке толшо молодёжь дене пашам ыштыше вуйлатыше, депутат ден самырык-влак (пашам ыштыше, парламентын еҥже, студент ден амалкалче-шамыч) икмыняр йодышым шке тӱшкаштышт каҥашеныт да, вашмут-влакым кагаз лаштыкеш возен, икте-весыштым палдареныт. Тыгак нуно «мозговой штурм» манме йӧн дене шке шонымашыштым ойленыт, чыла темылан иктешлымашым ыштеныт.
Икымше йодыш тыгай ыле – «Мом ме самырык тукым деч вучена?» Мутат уке, ятыр вашмут лийын: лидер койышыштым, шонымашым илышыш ворандарымыштым, сеҥымашыш шумыштым да шуко молат. «Молан кӱлеш Молодёжный парламент?» йодышлан каҥашымашат оҥай ыле.
А вара парламентёрын образше нерген, парламентыш кузе ойырымо нерген кутыреныт. Чыла тидыжым 6-шо созывыш сайлымаш годым шотыш налаш да илышыш пурташ шонат.
Парламент
Кызыт Молодёжный парламентын 5-ше созывыштыжо 34 еҥ пашам ышта. Тышеч 17 еҥже тӱрлӧ район ден олан представительышт улыт. Тынарак еҥ конкурс почеш эртен. Тушко политический партийын, образовательный, мер организацийын да предприятий-влакын еҥышт пуреныт.
Молодёжный парламентым вуйлатыше Мария Дорогова тиде форсайт- сессий нерген тыгерак каласыш:
– Тыгай стратегический сессий самырык-влакын парламентышт шотышто шонымашым республикысе тӱрлӧ могыр гыч пален налаш полша. Тылеч вара ме вашмут-влакым ушышко пыштена да ончыкыжым пайдалын пашам ышташ кузе лийме нерген иктешлымашым ыштена. Тидак кундемнам тӱзатымаште да ончыко вӱден наҥгайымаште шкешотан корным ончыкташ полшышаш.
А кызыт мыланна, 5-ше созывын еҥже-влаклан, эше пел ий пашам ышташ кодын. Ме икмыняр сеҥымашыш шуынна, тидын шотышто ойлаш огына лӱд. Созывна Марий Элысе Кугыжаныш Погынын илышыштыже шке кышажым кода. Ынде законопроектым Кугыжаныш Погыныш темлен кертына. Тыгак кугу форум ден мероприятийлашке ушненна. Юл кундем федеральный округысо чыла кундем гыч Молодёжный парламентын еҥже-влак мемнан кундемысе опыт дене палыме лияш толын коштыныт.
М.Дорогован мутшо почеш, кызыт ПФО-со Молодёжный парламент-влак шке пашаштым сайын палымышт да законын проектшым темлыме шот дене ойыртемалтыт.
Тиде форсайт-сессийыште вашмут-шамычым колыштмеке ӱшанет: ончыкыжым самырык тукым республикысе тӱрлӧ сомылым ворандарымаште утларак полшаш да тӱрлӧ пашалан мутым кучаш тӱҥалеш. Тек тыгак лиеш.
