Мокрице сокым йӱат – эре самырык лият

Мокрицыште С, Е да кушкыллаште шуэн вашлиялтше К (вӱр нугыдылыкым нормышто кучаш полша) витамин, минерал (кӱртньӧ, магний, вӱргене, кобальт), фитонцид-влак улыт. Ты кушкыл вегетососудистый дистонийым эмла, ишемий чер годым пайдале, пуалмым пытара, шекшым луктеш. А эше шинча пӱсылыкым саемда, ты шотышто модо деч кум пачаш пайдалырак.

Ожнысек калык эмлызе-влак свежа мокрице сокым мокш да верге черым, зобым эмлаш кучылтыныт. Тудым чурийыш йыгаш пайдале, поснак самырык-влакын чӱнча лектедыме годым. Мокрице сокым эре йӱаш гын, вуй корштымо нерген мондеда, нойымо эрта, сайынрак шарнаш тӱҥалыда, тыгак тудо лыпландара. Мокрицыште улшо Е витамин шоҥгемаш ок пу, вӱргорным эрыкта, организм гыч уда веществам луктеш.

Мокрице сокым пел стакан дене кечеш кум гана кочмо деч пел шагат ончыч йӱман. Тудым вӱд дене вараш, тыгак лимоным ешараш лиеш. Кум тылзе деч утла йӱман огыл.