Марий йылме дене ончыкылык специалист-влак студент илыш нерген кузерак шонат, мо дене тудо школышто тунемме деч ойыртемалтеш, могай нелылык нуным вуча, студент илыш деч лӱдыт мо? Марий кугыжаныш университетысе Калыкле тӱвыра да тӱвыра кокласе коммуникаций институтын икымше курсыштыжо тунемше ӱдыр-рвезе-влак тыге вашештышт:
Яна АТАБАЕВА, Морко посёлко:
– Студент илыш школ деч мужыр занятий, стипендий, у шинчымаш дене ойыртемал-
теш, шонем. Школышто тунемше-влаклан студент – пример. Университетыште тунемаш неле огыл манын кертам. Кажне занятийыш коштат, чыла жапыштыже ыштет гын, эн ушан да поро студент лият. Нимо деч лӱдаш ок кӱл. Тунемме деч вара мый тӱрлӧ кружокыш кошташ шонем, волонтёр отрядыш пурынем, еҥ-влаклан полшынем.
Анжелика КОНАКОВА, Шернур район, Марисола:
– Школ да университет коклаште ойыртем могай? Студент утларак шке шонымыж почеш ила, ответственность кугурак. Тудо тунемшаш, чулым лийшаш, шуко мероприятийыште вийым тергышаш. Лӱдыкшӧ нимогай уке, но англичан йылмым тунемме шотышто тургыжланем. Волейбол секцийыш кошташ шонем.
Виолетта АЛЕКСЕЕВА, Морко район, Октябрьский посёлко:
– Студент жап – у илыш. Школышто урок лийын гын, тыште – мужыр занятий. Вес семын тунемман, чӱчкыдын книгагудыш коштман, утларакшым шке ямдылалтман. Студент, мыйын шонымаште, эре ончылно лийшаш, интернет полшымо дене кӱлешан материалым муын, кучылт моштышаш. Тунемме нерген эше нимом ойлен ом керт. Чы-
лажат ончылно, илена – ужына.
Марина ПИДЫБАЕВА, Параньга район, Элнет:
– Студент, мыйын шонымаште, вузын йодмыжым шуктышаш. Тудо яндарын да чаткан ой-
лен моштышаш, весым пагалышаш. Нелылык деч мый ом лӱд. Тыгайже, очыни, сессий – малыдыме йӱд да шуко кофе. Мый сылнымутым йӧратем. Шочмо марий калыкем, тудын йӱлаж нерген эше шуко пален налнем, марий йылмылан вияҥаш полшынем.
Кеч-могай нелылыкым сеҥаш лиеш.
Владимир АПТУЛАЕВ ямдылен.