30 ноябрьыште Морко посёлкысо 6-шо номеран школышто Морко кундемысе туныктышо-влак коклаште «Мо? Кушто? Кунам?» интеллектуал модыш-таҥасымаш эртаралтын.
Тушко 10 туныктымо тӧнежын командыже ушнен. Кажне командыште 6 еҥ лийын. Кок турышто команде-влак 24 йодышлан вашмутым кычалыныт. Йодыш-шамыч илышын тӱрлӧ шӧрынжым авалтеныт. А кумшо турышто командир-влак гына уш-акылыштым тергеныт да командыштлан баллым погеныт.
Чыла команде кокла гыч Морко посёлкысо 6-шо №-ан школ сеҥышыш лектын. А кокымшо верым вич школ: Арын, Морко йочасад-влакын командышт, Моркысо 1-ше №-ан школ, Коркатово лицей да Октябрьский школ — пайлен. Кумшо вер дене Шӱргыял ден Зеленогорский школ-влакын командышт палемдалтыныт. Йоча усталык рӱдер ден Моркысо 2-шо №-ан школын командыштат чолгалыкым ончыктеныт. Кажне команде чапкагаз да изирак шийвундо пӧлек дене палемдалтын.
Елена Григорьева, Шӱргыял школын профсоюз ушем вуйлатышыже.
Снимкыште: «Мо? Кушто? Кунам?» интеллектуал модыш-таҥасымаште Шӱргыял школын 3-шо верым налше «Поколение» командыже.