Пӧртым чоҥаш мландым пуэныт, но пашам эшеат тӱҥалме огыл. Мланде дене пайдаланаш огыл гын, мо лиеш?
М.Васильев.
Советский район.
Росреестрын Марий Эл Республикысе управленийжым вуйлатышын сомылжым шуктышо В.ВОЛКОВ умылтара:
– РФ административный правонарушений нерген кодексын 8.8 статьяжын 3-шо ужашыж дене келшышын, мланде дене пайдаланаш огыл гын, административный штрафым тӱлаш перна. Мланде участкын кадастровый акшым палемдыме гын, ты акын 1-1,5 процентшым тӱлыктат, но 20 тӱжем теҥге деч шагал огыл. А мландын кадастровый акшым палемдыме огыл гын, 20-50 тӱжем теҥгем тӱлаш логалеш.
РФ Гражданский кодексын 284-ше статьяж дене келшышын, мланде пӧртым але вес оралтым чоҥаш ойыралтын да ты пашам кум ий жапыште шуктымо огыл (эше кужурак жапым документ почеш палемдыме лийын кертеш) гын, оза деч мландым поген налын сеҥат. Ты жапыш мландым кучылташ кӱлмӧ жап ок пуро. Тыгак стихийный бедствийлан але вес амаллан кӧра мланде дене пайдаланен кертме огыл гын, штрафым тӱлаш ок логал.
Кугыжаныш мланде надзор пашам шуктышо должностной лица гына мланде дене пайдаланыдыме фактым палемден, тыгак озам административно мут кучаш шогалтен кертеш.