27 мартыште «Мишкан — финн-угор тӱнян 2020 ийсе тӱвыра рӱдыверже» программе почеш «Йылме, йӱла, тӱвыра — марий калыкын поянлык негызше» регион-влак кокласе научно-практический конференций лиеш.
Тудым Башкортостан Республикысе Калык-влакын келшымаш пӧртышт, Мишкан район администраций да Марий Элысе «Ош кече» материальный огыл культур поянлыкым аралыме да вияҥдыме организаций эртарат.
Мероприятийын тӱҥ шонымашыже: тӱвырам арален да вияҥден шогаш; шочмо йылмым да литературым тунеммаште лекше проблемылам кораҥдаш; марий юмынйӱлам калыкын культур ужашыже семын арален кодаш да саемден колташ.
Конференцийыште ныл секций лиеш: «Марий юмынйӱла», «Марий йылме», «Эрвел марий-влакын мер илышышт», «Марий культур да йӱла».
Тушто выступатлаш шонышо-влак, докладын текстшым да лӱмнерым ончыктен, йодмашым тыгай адрес дене колтышаш улыт: oshkeche@mail.ru.
Ойырен налме теме дене выступленийлан вич минут жап ойыралтеш, да ешартыш вич минут каҥашымашлан пуалтеш. Конференцийысе доклад-влакым сборник дене савыктен луктыт. Йодмашым 15 март марте колтыман.
Научно-практический конференций Мишкан рӱдӧ книгагудын актовый залыштыже 27 мартыште 10 шагатлан тӱҥалеш.