Советский район Михайловка книгагудын лудшыжо-влак ты ялыште илыше С.В.Бахтинан сад-пакчаштыже уна лийыныт.
Светлана Витальевна – врач-терапевт, Советский посёлкысо рӱдӧ эмлымверыште тырша. Яра жапыштыже пеледышым кушташ йӧрата. «Светлана Бахтинан садше воктеч чарналтыде эртен каяш огеш лий, тушто шошо гыч тӱҥалын шыже мучаш марте пеледыш-влак сылнын пеледыт, йырваш тамле пушым шарат», – ойлат пошкудыжо-влак. Тудын пеледыш аланже йомак тӱня гай, тушто шукияш, икияш пеледыш-влак, тӱрлӧ декоративный кушкыл кушкыт.
С.Бахтина пеледыш-влакым шукертсек ончен кушта. Нӧшмым тӱҥ шотышто шке кушкылжо-влак гычак пога, тыгак кевытыште, кова-влак деч пазарыште наледа. Росотамат шке кушта, тудым пеледышым йӧратыше пошкудыжо-влакланат уло кумылын пуэда.
– Пеледышым ончен куштымашат – тыршымашым йодшо паша, вет кажне пеледыш шке семынже кычалтылше, нечке, кажныжым посна ончен моштыман. Но ончалза, могай нуно мотор улыт, кузе шинчам, чоным куандарат, – ойла Светлана Витальевна.
Пеледыш оза, сад-пакчажым сылныракым ышташ манын, эре ум кычалеш, эре оҥайым шонен муаш тырша. Тудо сад-пакча дене кылдалтше ятыр газет ден журналым: «Дача», «Люблю цветы», «Дачный сезон», «Приусадебное хозяйство» да молымат – наледа. Садыштыже чылажымат пакчасаска йыраҥ, саскам пуышо пушеҥге-влак дене мастарын келыштарыме, дизайнер семын тыршыме шижалтеш. Сад-пакчам у да мотор мончат шке семынже сӧрастара.
Светлана Витальевналан шуко пашам пелашыже Сергей Фёдорович ворандараш полша. Тудо Михайловка школышто руш йылме ден литературым туныкта. Садыште пӧръеҥын мастар кидше дене мотор печым печыме, корным ыштыме, виноград ден декоративный кушкыл-влаклан чаракым шындылме. Йоча-влакат полшаш толын каят. Ты ешын пашам йӧратымыжлан да оҥайым шонен муын моштымыжлан ӧраш веле кодеш.
Бахтинмытын сад-пакчашкышт миен толмеке, у шинчымаш дене пойдаралтынна, шке пакчам кузе сӧрастараш ятыр шонымаш вуйышто шочын. Ӱстел йыр погынен чайымат подылынна, А.Фетын да моло поэтын почеламутыштым лудынна.
Светлана Моторова.
Михайловка книгагудын пашаеҥже.
Советский район.
