Ме ола воктене садым налнена. Участкылан межам ыштымым але укем кузе палаш лиеш?
Т.Пирогов.
Йошкар-Ола.
Росреестрын Марий Эл Республикысе управленийжым вуйлатышын сомылжым шуктышо Вячеслав ВОЛКОВ умылтара:
– Межалыме годым мланде участкын чекшым палемдымым але укем палаш манын, ЕГРН гыч выпискым йодман але Публичный кадастровый картын данныйжым ончалаш лиеш. Межам ыштыме огыл гын, ЕГРН-ыште «Границы земельного участка не установлены в соответсвии с действующим законодательством» возымо лийшаш.
А публичный кадастровый карте – тиде онлайн-сервис (http://pkk5.rosreestr.ru), тушто ЕГРН-ыште улшо пого нерген сведений ончыкталтеш. Кусараш лийдыме погын кӱлеш объектшым муаш манын, кычалше строкаш (тудо кӱшыл шола лукышто верланен) погын адресшым але кадастр номержым возыман.
Мланде участкын чекше кушто кайымым ончыктымо огыл (межалыме огыл) гын, «Без координат границ» манын лектеш. Чекым палемдыме гын, картыште мланде участкын планже ончыкталтеш.