Росреестрын Марий Эл Республикысе управленийже палемда: ЕГРН-ыште 400 тӱжем наре мланде участке шотышто сведений уло. Тушеч 177 тӱжем мланде участкылан чекым палемдыме. Тыгодым тений 10 тӱжем мланде оза межам ыштыктен.
Росреестрын Марий Эл Республикысе управленийже мланде участке оза-влаклан межам ышташ да рашемдыме сведенийым ЕГРН-ыш (Кусараш лийдыме пого шотышто единый кугыжаныш реестр) пурташ темла. – Межам ыштымаш (межеваний) – тыгай процедур, кунам пошкудо участке-влак коклаште чек (границе) палемдалтеш.
Тачысе кечылан закон почеш межеванийым ыштыдеат лиеш. Тиде паша шке кумылын ышталтеш. Но палаш кӱлеш: лачак межеваний тендам шуко нелылык деч утара. Илыш ончыкта: мландылан раш чек укелан кӧра пошкудо-шамыч коклаште умылыдымаш лектеш, тума тарвана.
Межеванийым ыштеда гын, пошкудо ден шке мландыда кокласе чек шотышто кутырен келшеда, тыге шке правадам араледа, тыгак судыштат мланде участке шотышто ӱчашаш огеш перне.
Мланде участкылан чек уло гын, мланде дене кеч-могай сделкым ыштыме годым нелылык ок лек. Мутлан, тыгай участкым ужалашат куштылгырак, вет межам ыштыдыме участкым налаш кумылан еҥ шагал.
Межам ыштыме мыняр кумдык мланде дене пайдаланыме шотышто йоҥылышымат тӧрлаташ полша. Вет тудо ЕГРН-ыште але мландылан правам пуышо вес документыште ончыктымо сведений деч ойыртемалт кертеш. Тыгак кумдыкым чын ончыктымо огыл гын, мландын кадастр акшат весе лийын кертеш. Тыге мландылан налогат йоҥылыш палемдалтеш.