манеш Медведево район Митькан ялыште илыше Светлана Шабердина.
Светлана Йошкар-Оласе 9-ше №-ан ГПТУ-што ургызылан тунемын. Марлан лекмекше, пелашыже манын: «Мӧҥгыштӧ шинче, мый шке пашам ышташ тӱҥалам».
С.Шабердина – ныл шочшан ава. Таче кечылан нуно ача-авашт пеленак улыт. Эн кугуракышт, Андрей, 10-шо классыште тунемеш, Катя – 9-ше классыште, Дима – 1-ше классыште. А изи Марина аваж пелен шогылтеш.
Ялыште илыш шке семынже пӧрдеш: ава ешыжлан кочкаш шолта, комбым, чывым, кӱркам пукша, моло суртсомылкам шукта, кидпашам ышта.
Светлана кидпаша аланыште тӱрлылан тунемеш. Теве кушто ургымо мастарлыкшым кучылташ пӱрен улмаш! Тудо ынде латкуд ий пидеш. Аваже тудым носким пидаш туныктен. Кум ий ончыч пушкыдо модышым пидаш тунемын. Эн ончыч ава шке шочшыжо-влаклан модаш ямдылен, варажым ужалашат тӱҥалын.
«Пушкыдо модыш-влак йочаланат, ача-аваштланат куаным кондат. Утларакшым ала-молан мераҥым пидаш йӧратем. Ятыр мераҥемже Марий кундемын тӱрлӧ районыштыжо «илат», рӱдолаште илыше-влакат наледеныт. Тыгак йодмаш почешат иктаж арверым ыштем. Мутлан, азалан пураш келшыше настам южгунам йодыт, йочан лӱмжӧ дене кидшолым келыштарем», – манеш Светлана.
Шукерте огыл кидмастар 2023 ийын символжым ончыктышо янлык-влакым, кролик ден пырысым, пидын. Нунышт лу утла погынат.
– Тӱрлӧ пырысигым пидынам. Южыжым ик кечыште ямдылен шуктем, а южыж дене 5-7 кечат шинчылташ логалеш. Модыш пырысигым йоча-шамыч путырак йӧратат, вигак налын пытарат. Теве ӱдыремлан ыштыме пырысиге гына пӧртнам сӧрастара, – каласкалыш ныл шочшан ава.
С.Шабердинан эн кугу пушкыдо модышыжо 50 сантиметран маска лийын. Эше тыгаяк кугытан пупсикым пидын.
