
Мераҥлашкам (кислица) калык медициныште шукертсек кучылтыт. Тудо аппетитым саемда, шекшым луктеш, кочкышым шулыктарыме пашам саемда, пуалме ваштареш кучедалеш, шукшым пытара, артроз деч арала, чогашыл корштымым чара да моло черымат эмлаш полша.
Мераҥлашка шудо сок антисептик семын пеш пайдале. Тудым мӱй дене пырля (икнаре налман) варыман. Вартышым ик семын шуко кийыме дене могыр коваште пуаҥмыш (пролежень), трофический йораш йыгаш сай. Тыгак пӱйшыл пуалме да стоматит годым полша.
Сусыргенда, вӱр йога гын, свежа лышташым сусырыш пышташ лиеш. Сусыр шӱяш тӱҥалын, вашке парем огеш керт гын, кушкылым тыгыдемдыман, марльыш пӱтыралман, сусыр верыш пыштыман. Повязкым кум-ныл шагат гыч вашталтыман.
Диатез але золотухо годым ик стакан шокшо вӱдыш 20 грамм кушкылым пыштыман, шокшо пар ӱмбалне вич минут кучыман. Йӱкшышӧ лемым 50 мл дене кечеш кум гана йӱман, йоча-шамычлан кок пачаш шагалрак пуыман. Золотухо годым 10 кече эмлалтман. Тыгак эмганыше верыш лемеш нӧртымӧ марльым пышташ лиеш (15 минут кучыман), но тунам 30 грамм шудым налман.
Организмыште шукшым пытараш манын, лемым ик кугу совла дене кечеш кум гана яра пагареш ик изи совла мӱйым подылын йӱман. Тыге шым кече эмлалтман. Ик тылзе гыч уэш йӱаш лиеш.
Энурез (шондым кучен кертдыме) годым 200 мл шокшо вӱдыш ик кугу совла коштымо шудым пыштыман, кок шагат шинчыктыман, шӱрыман. Лемым ик кугу совла дене кечеш куд гана йӱман.
Коштымо лышташ дене чайым шолташ сай. Шопырак таман чай йӱмӧ шумым пытара, вий-куатым ешара. 300 мл вӱдлан кок изи совла коштымо шудым налман.
Кушкылым пеледышге, лышташге майыште да июньышто погыман. Вигак мушман да коштыман. Тудын дене пагар йымалысе ту, мокш, шекшкалта чер годым эмлалташ огеш лий. Тыгак кужу жап йӱман огыл.