Татарстанысе калык-влакын келшымаш пӧртыштышт Озаҥысе марий калыкле-тӱвыра автономийын VII погынжо лийын.
Тушко 60 наре делегат миен. Тӱҥ докладым Татарстанысе марий-влакын НКА-штын пашаж нерген О.Третьяков ыштен. Тыгак Марий Эл дене пырля шуктымо сомылым, грант пашам каҥашыме, Мамадыш ден Балтаси районласе пӧлка-шамычын пашаштым радамлыме. А вара автономийым вуйлатышылан йӱкленыт – у председательлан чолга мер пашаеҥ Н.Кукушкинам сайленыт.
Тыштак Марий Эл гыч намийыме сӱрет выставке ончыкталтын. «Лай мардеж», «У ял», «Йоҥгалт, гармонь йӱк» ансамбль да посна мурызо-влак, Рушарня школышто тунемше-шамыч, Балтаси район гыч Фёдоровмытын еш ансамбльышт мастарлыкыштым ончыктеныт.