Марий Элыште Мер эскерымаш штаб республикыштына эртыше сайлымашым эскераш тӱҥалын 
6, 7 да 8 сентябрьыште сайлымаште молгунамсе семын веле огыл, тыгак дистанционно йӱклен кертына. Сайлымашын каен шогымо пашажым тыгак Мер эскерымаш штаб эскера. ДЭГ-ын кузе эртымыжым кум эскерыше тӱткын онча.
Марий Элыште сайлымашым эскерыше штабым вуйлатыше Евгений Кузнецов кундемыштына 600 наре независимый эскерыше уло манын каласыш. Чыланат нуно сайлымашын кӱлеш семын эртымыжым ончат да штабышке увертарат. Тушто сайлымашын кузе эртымыжым онлайн йӧн полшымо дене ужын кертыт.