СВО-што улшо-влаклан вургемым ургызо-шамычын толкынышт тыгак маналтеш – «Шьём для наших».
Мобилизаций тӱҥалмекак, тыгай пашам Пермь олаште илыше ик ӱдыр тӱҥалын. Тудо эн ончыч салтак вургемлан выкройко-влакым ыштен ужален. Варажым ургаш тӱҥалыныт. Тидыже вес олалаштат посна толкын семын шарлен.
Йошкар-Олаштына тыгай сомыллан эн ончыч ургызо Юлия Калашникова пижын. Толкынын кузерак пашам ыштымыж нерген ургызо Алёна Анисимова каласкалыш:
– Кызыт толкынна тыге пашам ышта: эн ончычак оксам погымо нерген увертарена, туддене ик рулон куэмым налына. Мутлан, телым флисым, а кеҥежым кулиркым. Выкройкым ыштена да шкенан чатыште ургызо-шамычлан возена: выкройкан пакет-влак ямде улыт, кумылан-шамычым ты пашаш ушнаш ӱжына. Чылажымат ме шкенан мӧҥгыштына яра жапыштына ургенна. Икте 20, а весе 30 штук дене. Кажне еҥ ты пашам шке шонымыж почеш шукта. Мутлан, иктын эргыже СВО-што, весын эше вес амалже уло.
Юлия Калашникован декрет деч вара пашаш лекмекыже, организоватлыме сомылым ме Юлия Габова дене пырля шке ӱмбакына нална. Кеҥежым адакат оксам погымо нерген увертарышна. Тыге август мучаште 100 шем лонгсливым (кофтым) ургышна. Сентябрьыште шокшо вургемлан материалым нална. Кажне тылзын иктаж-мом да колтена. Телым флис гыч толстовкым, кӱпшан (начёсан) термобельём, а кызыт флис гычак 145 балаклавым (чурийым да шӱйым петырыше упш) ямдыленна. Ты арнян 30 балаклавым «Сердце матери» мер организацийыш намиен пуышым. Чыла пашанам лач тудо виктарен шога, ямде вургемнам колта.
Мемнан деке ковай-влак мӧҥгыштӧ рулон дене кийыше материалыштым кондаш тӱҥальыч. Туддене ме йымал вургемым ургенна. Тыгак натуральный ужгам конденыт ыле. Пелашна-влак тудым пӱчкеден, йоллан стелькым ыштышт. Кодшо флис гыч пижым келыштарышна.
Кызыт кок рулон куэмым заказатлыме. Мемнан деч масхалатым йодыныт. Выкройкым Пермьысе ургызо-влакыным кучылтына, вет военный вургемын шке йодмашыже.
Полшаш шонышо-влак, «ВКонтакте» соцкылыште «Шьём для своих» группым муын, йодышдам возен колтен кертыда.
СВО-лан полшаш шонышо-влак, Алена Юрьевна Анисимован ВТБ банкысе картышкыже (2200 2404 4099 7407) оксам колтен кертыда.
Эльвира Терентьева.
Фотом толкынын архивше гыч налме.