Александра Трусова – ийыште шкетын мунчалтымаше фигуристке. 23 июнь 2004 ийыште Рязаньыште шочын. 2008 ийыште икымше гана коньким чиен. 2013 ийыште ешыже Москош илаш куснен, тыге дыр Александр Волковын группышкыжо ушнен. 2016 — 2020 ийлаште кумдан чапланыше тренер Этери Тутберидзен группыштыжо мастарлыкшым нӧлтен. Идалык наре Евгений Плющенкон академийыштыже мунчалтымеке, вара уэш Э.Тутберидзен группышкыжо пӧртылын.
Александра – 2017 ий годсек Российысе сборный командын еҥже. Тудын мунчалтымыжым йӧратыше-влак ӱдырлан «Русская Ракета» лӱмым пуэныт. Саша коньки дене ийыште мунчалтымашын историйыштыже ятыр элемент-влакым икымше гана ончыктен. Мутлан, кӱшкӧ тӧршталтен, южышто ныл гана пӧрдын, ийышке йол ӱмбак чаткан шогалме лутцым, тулупым, флипым ыштен. Ӱдыр шке программыштыже ятыр тӧрштылмаш-влакым ончыкта. 2022 ийыште Пекиныште эртаралтше телымсе Олимпиадыште ик программыште вич тӱрлӧ тӧрштылмашым ончыктен, тыгайже историйыште икымше гана лийын. Александра Пекиныште ший медаль дене палемдалтын.
А.Трусова Российын тÿнямбал классан спорт мастерже (2019 ий), «За заслуги перед Отечеством» (2022 ий) I степенян орден дене палемдалтын. Тӱнямбал таҥасымашлаште, Европын, Российын чемпионатлаштыже ятыр гана сеҥыше-влак коклаште лийын. Юниор-влак кокласе тӱнямбал чемпионатыште (2018-2019) кок ганажат чемпион лийын. Саша фигуристке семын тӱнямбал рекордым кугыеҥ-влак коклаште ныл гана ончыктен, куд гана – юниор семын.
Саша шкенжым тӱрлӧ вере шуара, эреак уым кычалеш. Кызыт – Новогорск олаште сборышто, тыгак – Е.Плющенкон эртарыме «Союз чемпионов» фестивальыште выступатла. Тудыжо тӱрлӧ олаште эрта. Тений шошым фигурист Марк Кондратюк дене келшаш тӱҥалын.