Рузиль Минекаев
Режиссёр Жора Крыжовниковын 1980-ше ийла мучашысе Озаҥ оласе самырык-влакын группировкышт нерген войзымо «Слово пацана. Кровь на асфальте» сериалын премьерже 2023 ий ноябрьыште лие. Тудым Wink да Start онлайн-кинотеатрыште кажне арнян ик серий (чылаже кандаше) дене ончыктеныт. Сериалыште Марат Суворовын (Адидас младший) рольжым Рузиль Минекаев модын.
Рузиль Татарстан кундемысе Нурлат олаште 1999 ий 20 майыште шочын. Тудын йыгыр шӱжарже уло. Школышто тунеммыж годым «Сэлэт» йоча сымыктыш школышто вокал дене заниматлен. Индешымше класс деч вара Озаҥ оласе театральный училищыште, вара ГИТИС-ын режиссёр факультетшын актёр-влаклан группыштыжо шинчымашыжым пойдарен.
2020 ий гыч Минекаев кинолаште да телевиденийыште сниматлалташ тӱҥалын. Икымше гана «Уличное правосудие» сериалыште модын. Тылеч вара «Подслушано в Рыбинске», «Напарники», «Смычок» проектлаште войзалтын. 2021 ий годсек «Школа современной пьесы» театрыште тыршен, но 2023 ийыште каен. Тидыжым ятыр кинопроектышке ушнымыж дене умылтарен. Ты ийынак Рузильым «Слово пацана. Кровь на асфальте» сериалын ик тӱҥ геройжым модаш ойыреныт. «Кинопоискын» обозревательже В.Корецкий Минекаевым сериалын «открытийже» семын палемден. Сериал деч вара Рузильын соцкыллаштыже подписчик-влак миллион утла еҥлан ешаралтыныт.
Самырык актёр актрисе Азиза Бекманова дене ешым чумырен. Нуно Озаҥ оласе училищыште тунеммышт годымак келшаш тӱҥалыныт. Рэмиль эргышт кушкеш.