Кажне У ийлан Эльдар Рязановын «Ирония судьбы, или С лёгким паром!» фильмже ончыкталтеш. Тушто тӱҥ героиньым – Надя Шевелёвам – Барбара Брыльска модеш.
Тудо 1941 ийыште Польшысо Скотники олаште шочын. Польшысо театрын да кинон актрисыже. Тӱрлӧ элысе кинорежиссёр-влакын фильмлаштышт сниматлалтын. Икымше кугу рольжо 1963 ийыште «Их будний день» фильмыште лийын. Польшысо «Анатомия любви» фильм деч вара тудын лӱмжӧ утларак йоҥгаш тӱҥалын. СССР-ыште «Ирония судьбы» фильмыште Надян рольжым модмылан тудым СССР-ын Кугыжаныш премийже дене палемденыт.
XXI курым тӱҥалтыште театрысе сценышке лекташ тӱҥалын. Икымше рольжо «Квартет» постановкышто лийын. Барбара Брыльскам Российысе «Казус Белли», «Лучше быть красивой и богатой», «Адмираль», «Первый скорый», «Тайна четырех принцесс» фильмлаште ончаш лиеш.
Актрисе икмыняр гана марлан лектын. Ешым математик, актёр, врач дене чумырен. Кумшо марийже гинеколог врач лийын. Тудын деч кок йочам ыштен. 18 ий пырля илымеке ойырленыт. Ӱдыржӧ актрисе да модель профессийлаште шуаралтын. 1993 ийыште съёмко деч вара кайымыж годым 20 ияш ÿдыржын ӱмыржӧ корно туткарыште трагически кӱрылтын. Людвиг эргыжын кок йочаже уло.
Барбара Брыльска кызыт Варшава деч 80 меҥге тораште верланыше дачыштыже ила. Шке пакчаштыже ончен куштымо пакчасаска гыч телылан тӱрлӧ шапашым ямдылаш йӧрата.