Футбол дене Российысе «Кожаный мяч – детям» турнирыште Марий Элын чапшым «Медведево – 2014» команде аралаш тӱҥалеш.
Ты турнирын регионысо йыжыҥыштыже лачшым ты команде икымше верым налын. Кокымшо верыш Йошкар-Оласе «СШОР» школын командыже, кумшо верыш Волжск оласе «Волжск» командын футболистше-влак лектыныт.
Турнирын кокымшо йыжыҥже 6-13 ноябрьыште Иваново олаште лиеш. Тудо «Спорт – норма жизни» федеральный проектын «Демографий» нацпроектше кӱшеш эртаралтеш.