18-19 апрельыште Ярославский областьысе Ростов Великий олаште селаласе йоча команде-шамычын футзал дене регион-влак кокласе «Дрим-Урожай» турнирын финалже лийын. Тудо «Игры наследия» кугу проектын ик ужашыжлан шотлалтеш.
Тушко элнан 10 регионжо гыч 250 наре спортсмен ушнен. Нуно кызытсе илышлан келыштаралтше фиджитал спортышто шкеныштым терген онченыт, бассейныште йӱштылыныт. Турнирыште кум тӱрлӧ ийготан команде-влак таҥасеныт.
Марий Элын чапшым ты таҥасымашыште Советский посёлкын «Звезда» командыже арален. Нуно 2012-2013 ийлаште шочшо-влак коклаште икымше, 2014-2015 ийлаште шочшо-влак коклаште кокымшо, 2010-2011 ийлаште шочшо-влак коклаште кудымшо лийыныт.
Марий Элысе Спорт министерствын ВК-се тӱшкаж гыч налме фото.