Элыште да регионышто у коронавирус инфекций шарлымылан кӧра республикыштына волонтёр-влакын «Мы вместе» штабышт уэш пашам ышташ тӱҥалын. 65 ияш деч кугурак еҥ-влак волонтёр-шамыч деч полышым йодын кертыт. Штабын пашаеҥже-влак нунылан кочкышым, эмым я моло кӱлешан сатум налын кондат.
Кызыт республикыштына «Мы вместе» штаб Йошкар-Оласе Самырык-влаклан полатыште (Зеленый урем, 1-ше №-ан пӧрт) пашам ышта. Тушко 8 (8362) 38-33-16 телефон дене йыҥгырташ лиеш. Федеральный «шокшо линийын» номерже – 8-800-200-34-11. Тылеч посна шке кумылын полышым пуышо штаб-влак ола округлаште да районлаште 1 ноябрь гыч пашам ыштат.
18-50 ияш улыда гын, теат волонтёр семын пашам ыштен кертыда. Тидлан мывместе2020.рф официальный сайтыште регистрацийым эртыман.