#МУЗЫКАВМЕСТЕ проект ПФО калык-влакын шым йылмышт дене «Матушка-Земля» у композицийым ончыкта
#МУЗЫКАВМЕСТЕ проект «Кугу Элын мурыжо-влак. Юл кундем гыч йӧратен» кугу серийжым Юл кундемысе шым национальный йылме дене йоҥгалтарыме «Матушка-Земля» муро дене мучашла.
Съемко Юл кундем федерал округын эн палыме да сылне верлаштыже эртен. Марий Элыште кадр-влакым Воскресенский набережный ден Йошкар-Оласе Гоголевский кӱварыште ыштыме. Кундемыштына палыме марий рэпер Шып Лий (Денис Шаблий) ты проектыш ушнымыж нерген тыге каласкала:
– #МУЗЫКАВМЕСТЕ проектын вийже – Российын чыла лукшо гыч артист ден музыкант-влакым ушымаште. Тиде мозаикын ужашыже лияш – кугу ответственность да кугешнымаш. Проектыште пашам ыштымем кужу жаплан шарнымашеш кодеш, вет мылам тудо оҥай сюрпризым шылтен. «Матушка – Земля» мурым йоҥгалтараш тӱҥалмем нерген Тимур Ведерников деч звукозапись студийыштак пален налынам. Мешанчык: мурышто речитатив уке. Сандене шке куплетем студийыштак возаш ойырымо икмыняр минутышто шонен луктынам. Мо тышеч лектын – клипыште ужыда. Мый ончаш толшо-шамычлан сай кумылым тыланем, а проектын командыжлан – Российысе калык-влакын икоян улмо идалыкышт семын увертарыме 2026 ийыште эшеат шуко тыгай клипым войзаш.
Марий Элын калык артистше Сергей Данилов клипыште шӱвырым шоктен. Теве тудо мом ойла:
– Оҥай проект. Войзымо паша писын эртен, Тимур Ведерниковын командыже – чын профессионал, нунын дене пашам ышташ куштылго. Шӱвыр дене мыйын партийлан тональностьым ойырен налаш неле улмаш, но тидым ме ыштен кертынна. Организатор-влаклан марий шӱвырын йоҥгалтмыже моткоч келшен. Тыгак марий шовырым чиенам да тёркупшым упшалынам ыле.
Тыгак пректыш мурызо Надежда Крылова ушнен:
– «Матушка-Земля» мурым шукертак марла мурынем ыле. Светлана Архипова текстым кусарен, тиде тудын моткоч сайын лектын. Йолташем проектлан мурын марий версийжым кычалме нерген уверым ужын, участвоватлаш темлен. Тимур Ведерниковын командыж дене деталь-влакым каҥашышна да возаш пижна. Тимур тиде пашаште сеҥена манын ӱшанен, – да чынак, чыла сомыл чылт ик шӱлыш дене эртыш. Профессионал-влак дене паша моткоч оҥай улмаш. Вара клипым войзеныт, тушто мый национальный марий костюм дене лийынам.
«Марий Эл» Кугыжаныш куштышо ансамбльын художественный вуйлатышыже Александр Селиванов:
– Клипым июньышто Чарла кремльыште войзенна. Паша пеш писын да кӱлеш семын эртен, игечыжат сай лийын. Чылажат икымше дубль гычак лекте. Шернур пайрем композицийым «Матушка-Земля» сем почеш йоҥгалтаренна. Организатор-влаклан келшен, мыланнат тыгак.
Мутат уке, мыланна тиде кугу кугешнымаш да ответственность – клипыште войзалташ да ПФО проектыште республикым ончыкташ. Мый ӱшанем, ме огына подводитле. «Марий Эл» куштышо ансамбль – тиде содыки республикын брендше, сандене чынлан шотлем: ойырен налмаш лач мемнан коллективлан возын. Мут толмашеш, тиде куштымашлан у костюмым ургымо. Мемнан дене костюм фондым уэмдыме лийын, сандене тыге келшен толын: «премьерышт» тиде клипыште лийын.
Ме Тӱвыра, печать да калык-влакын пашашт шотышто министерствылан да Правительстве Председательын алмаштышыже, министр Константин Ивановлан тауштена. Лач тудын деч клипыште республикым ончыкташ темлымаш пурен. Ансамбльна шкенжым тӱрлӧ проектыште эре муэш.
#МУЗЫКАВМЕСТЕ проект серийын куд видеоклипшым ончыктеныт ыле: «Течет река Волга», «Гляжу в озера синие», «Как молоды мы были», «Вместе весело шагать» да «Наш сосед», «Так случилось, мужчины ушли». Ончычсо клип-влак семынак «Матушка-Земля» #МУЗЫКАВМЕСТЕ проектын лаштыклаштыже, тидын шотыштак ВКонтакте официальный тӱшкаште да полномочный представительын сайтыштыже pfo.gov.ru/ ужаш лиеш, тыгак трансляций регионысо телевизионный каналлаште эрта.
Тиде кугу проект Тӱвыра инициативын президент фондын, ПФО-што Россий Федераций президентын полномочный представительын аппаратшын да «ДНК России» проектын полшымышт дене илышыш шыҥдаралтын.