1990 ийыште, Морко район Шӱргыялышке марлан мийымеке, пелашемын 74 ияш коваже Дария Петровна Кудряшова матрушкан чайым йӱаш туныктыш. Шолтымо годым шудым вигак чайникыш пышта ыле.
– Кызыт пеш сай, ожнысо семын матрушкам погаш шуко меҥгым кайыман огыл, воктенак шочеш, – икана пакча гыч матрушкам кӱрлын пуртымекше, куанен пелештыш кована.
А вара ешарыш:
– Ожныжо тыгай тамле чайым йӱаш Татарстан Республикысе Крымшит чоҥга марте йолын кошталтын. Шуко-шагал ма иктаж 15 меҥгыже лиешат дыр, ала шукыракат. Тунам корно кужытым шотыш налме огыл. Кугу нумалтышым, ваче гоч сакалтен, мӧҥгыш нумал толалтын, а вара изирак кылдышым ыштен кошташ сакалтыме. Матрушкаже ошма чоҥгаште шочын, а мемнан дене мланде шунан. Тыгай мландешат матрушка шочын кертмылан ончыч ӱшаныме огыл. Шочеш улмаш.
Дария Петровна 2008 ий гычак пеленна уке, а «бавайын чайже» манме ойсавыртыш мемнан коклаште кызытат ила. Матрушкан чайым чыланат йӧратена. Жапше годым меат кылдышым ыштен коштенна. Ты чайшудо сад-пакчаштынак шочеш. Лач шолташыже веле кована семын огыл, изишак вес семын шолтена: изи чайникыш матрушкам пыштена, шолшо вӱдым темен шындена да чайшудын тамле там ден пушым пуымыжым икмыняр жап вучалтена. Вара йӱын шерет ок тем!
Светлана Алексеева.
Медведево посёлко.
Еш альбом гыч налме фото.