1990 ийыште, Морко район Шӱргыял ялышке марлан мийымекем, пелашемын 74 ияш коваже Кудряшова Дария Петровна (24.03.1916) матрушкан чайым йӱаш туныктыш. Тутло шудыжым тудо шолтымо годым вигак чайникыш пышта ыле.
– Кызыт пеш сай, ожнысо семын матрушкам погаш шуко меҥгым кайыман огыл, воктенак шочеш, – икгана пакча гыч матрушкам кӱрлын пуртымекше, куанен пелештыш кована.
А вара ешарыш: «Ожныжо тыгай тамле чайым йӱаш пошкудо Татарстан кундемысе Крымшит чоҥгаж марте йолын кошталтын. Шуко-шагал иктаж 15 меҥгыже лиешат дыр, ала шукыракат. Тунам корно кужытым шотыш налме огыл. Кугу нумалтышым ваче гоч сакалтен, мӧҥгыш нумал толалтын, а вара изирак кылдышым ыштен кошташ сакалтыме. Матрушкаже ошма чоҥгаште шочын, а мемнан дене мланде шунан. Тыгай мландыштат матрушка шочеш манын, ончыч ӱшаныме огыл. А шочеш улмаш…»
Дария Петровна 2008 ий гыч пеленна уке, а «бавайын чайже» ойсавыртыш мемнан коклаште кызытат ила. Матрушкан чайым чыланат йӧратена. Жапше годым меат кылдышым ыштен коштена. Чайшудыжо сад-пакчаштынак шочеш. Лач веле кована семын огыл, изишак вес тӱрлын шолтена: изи чайникыш матрушкам пыштен, шолшо вӱдым темен шындена да чайшудын тамле там ден пушым пуымыжым икмыняр жап вучалтена. А вара… Вара йӱын шерет ок тем!
Ший гай вӱдым шокшым-шокшым
Темем: шолтем чайшудо чайым.
Ом шотло укшым. Налын чокым
Пыштем ойырен кокла гыч сайым.
Ласкан шинчем, нигуш ом вашке:
Тек чон мура лӱҥгалтын, лайык.
Ончем яндар кечан кавашке
Да подылам мӱй дене чайым.
Шула пушеш трук неле шоныш,
Шӱмем лушка, рудалын йылмым.
Кушеч ала чай вийым кондыш
Поктен лукташ капем гыч кылмым?
Чайшудо чайым, тамлым-тамлым,
Темлем тылат, уна лият гын.
Жап тек пырля эрта тыматлын,
Ойпидышна йоҥга шиялтын.
Светлана Алексеева.
Медведево посёлко.