3-7 апрельыште Марий Элыште ссузлаште шинчымашым налше студент да школлаште кугурак класслаште тунемше-влак коклаште профессиональный мастарлык шотышто «Профессионалы» чемпионатын регионысо этапше лийын.
Таҥасымаш-влак 14 тунемме организацийыште (Йошкар-Ола, Волжск, Козьмодемьянск олалаште, Медведево, Оршанке посёлкылаште, Звенигово районысо Чакмарий ден Советский районысо Вечын селалаште) эртеныт. Тений 366 конкурсант 52 компетенцийыште мастарлыкшым терген. Нунын коклаште 40 тунемше лийын.
Тиде жапыштак пленарный заседаний, «йыргешке ӱстел», дискуссионный площадке, мастер-класс, экскурсий, вебинар, выставке-влак лийыныт. Сеҥыше-влакым 7 апрельыште палемденыт.
Регионлаште чемпионат Россий мучко эртаралтеш. Марий кундемат тыгай шотан таҥасымашыш ынде луымшо ий ушна да сеҥыше радамыш лектеш.
Марий Элысе образований да науко министр Лариса Ревуцкаян палемдымыж почеш, тыште пашам пуышо-влак дене ончыкылан кыл ышталтеш. Чемпионатыште сеҥыше, призёр-влаклан регионысо эн сай предприятийыште стажировкым эрташ йӧн пуалтеш гын, сеҥыше радамыш лекше выпускник-влак тушко пашам ышташ каен кертыт. Тений бульдозер дене пашам ыштыме, ялозанлык да аграрный технологий дене кылдалтше компетенций-влак дене участник-влак шкеныштым тергеныт.
Российыште чемпионатын регионысо йыжыҥже-влак 30 апрель марте шуйнат. Тений июньышто да июльышто сеҥышыш лекше-влак отборочный йыжыҥыш куснат. Тушто финалист-влакым ойыраш тӱҥалыт.
11-15 сентябрьыште Великий Новгород олаште кӱкшӧ технологий дене кылдалтше чемпионатын финалже лиеш. Кандаш у да кӱлешан компетенций-влак почеш эн виян участник-влакым ойырат.
25-29 ноябрьыште Санкт-Петербургышто ик эн тӱшка, кӱлешан компетенций-влак дене «Профессионалы» чемпионатын финалже эртаралтеш.
Шернур район Кугу Сердыж ялеш шочын-кушшо, кызыт Йошкар-Оласе технологический колледжыште 1-ше курсышто банк пашалан тунемше Жанна Полтасова тыгай чемпионатыш икымше гана ушнен. Ӱдыр сайын тунемеш, тыгак тӱрлӧ мероприятийыште шкенжым терга.
– Мыланем колледжыште тунемаш келша. Группыштына ме 26 еҥ улына. Туныктышо-влак чолгалыкем ужыныт, сандене тыште шкем терген ончаш темленыт. Тушко пырля тунемме кум ӱдыр да эше 2-шо курс гыч ик студентке ушненна. Ме «Банковское дело» манме компетенцийыште шкем тергенна: клиент-влаклан консультацийым пуэнна, банкысе тӱрлӧ услугым темленна. Ты пашам профессионально ыштен моштымынам ончыктенна. Дипломым налмеке, вузышко тунемаш пураш шонем, – мане тудо.
Пашазе профессий-влак тачат, эрлат, ончыкыжымат кӱлыт. Тыгай чемпионат виянрак, мастаррак лияш полша, да эн тӱҥжӧ, опытым пуа.