Советский район Кукмарий ялын эргыже Е.В.Садовин – мастар дечат мастар еҥ.
1984 ийыште Н.К.Крупская лӱмеш Марпединститутын индустриально-педагогичесий факультетшым тунем пытарымеке, Евгений Викторович кок вере пашам ыштен, фото ден технический кружоклам вуйлатен. А Вечын селасе техникумышто 1987 ий годсек пашам ышта. Тӱҥалтыш кок ийыштыже самырык туныктышо тунемаш толшо-влакым трактор дене кудалышташ, тудым ачалаш туныктен, автомобиль шотышто шинчымашым пуэн. Тылеч вара слесарный мастерскойышко куснен. Преподаватель да производствылан туныктышо мастер.
Мини-трактор
Е.В.Садовин сварочный аппарат, токарный, фрезерный, сверлитлыме станокла дене пайдаланен мошта. «Слесарное дело», «Материаловедение», «Инженерная графика» да моло предметым туныкта. Ончыч техникумышто электромеханик, водитель, техник-механик да моло специальностьлан рвезе-влак гына огыл, ӱдыр-шамычат тунемыныт.
Кызыт педагог «Умелые руки» кружокым эртара. Тунемше-влак занятийлаште сверлитлыме, токарный, пушеҥгым обрабатыватлыше станок-влакым, циркуляркым, трубогибым, пеледышым куштышылан йӧнештарыме подставкым, сравочым да моло ӱзгарымат ыштат. Вара нуным кажне ийын ярмиҥгаш ужалаш луктыт.
Шукерте огыл Евгений Викторович мини-тракторым ыштен шогалтен. Тудо Т-150 трактор форман, ныл ораважат вӱдышӧ. Тушко «Ока» машинан двигательжым шынден. Тудым кас еда кум ий наре поген. Кызыт ты трактор – ӱшанле эҥертышыже. Лопкытшо 90 сантиметрыш шуэш, кӱкшытшӧ метр утларак лиеш. Туддене оза куралеш, шында, культивироватла…Тракторыш плугым, окучникым, культиваторым да молымат пижыкташ лиеш. Чыла тидым мастар еҥ шке ыштен. Кызыт пареҥгым кӱнчаш картофелекопалкым ышташ шонкала.
Ныл трудовик
Садовинмыт ешыште шым йоча кушкын. Евгений – пытартыш икшыве. Тудын Альберт, Эрик да Валерий изаже-влакат Марпединститутын ик факультетшым тунем пытареныт, Кукмарий, Алексеевский школлаште трудым туныктеныт. Кугурак изашт естествознаний факультетыште кӱшыл шинчымашым налын, а ӱдыр-влак – МарГУ-што.
Евгенийым техникылан Валера изаже шӱмаҥден. Изаже Йошкар-Оласе совхоз-техникумым техник-механиклан чыла «визытанлан» гына тунем пытарен. «Восход» лӱман шӱкшӱ мотоциклым налын да тудым ачалаш Женям ӱжын. Тунам рвезылан улыжат шым ий лийын. Кандаш ияш улмыж годым изаже икымше гана мотоциклыш шынден да, заводитлаш манын, шӱкалын колтен. Женя кудалын, аллейыште пӧрдын-пӧрдын, но савырнен кудал толын моштен огылат, «Кучыза! Кучыза!» манын кычкырен шортын. Кызыт Евгений Викторовичын мини-тракторжо, машинаже, «Беларусь» тракторжо улыт.
ТИЧМАШ СТАТЬЯ — «КУГАРНЯ» газетыште (2021 ий 26 ноябрь).