Кужэҥер район Тошто Йӱледӱр тӱвыра пӧртыш пурымеке, маскироватлалтме сеткылан рӱдӧ сеткыжым пидше ӱдырамаш дене палыме лийым.
Сеткым пидеш
«Маргарита Ивановна Кузнецова улам, – мане. – Сеткым пидаш тунемаш февральыште лӱмынак Шернурышко миен коштна. Мыланна куд метр кутышан да кум метр лопкытан сеткым пӱчкын пуышт, вара шкеак шӱртӧ дене пӱтыреда маньыч. Колым кучаш вапшымат тыгак пидыт. Мый клубышто кечывалым пидам, а тӱвыра пӧрт вуйлатыше Людмила Васильевна – кастене мӧҥгыштыжӧ. Тыге 23 сеткым коктын ямдыленна».
Мутланымыж годымат 58 ияш мастарын кидыштыже шуша пӧрдеш гына. Чот кыртмен шупшмылан кид нойымо нергенат палдарыш. Маргарита Ивановна такшым неле пашам ыштен тунемше: шочмо ялысе Чапаев лӱмеш озанлыкыште (кызыт вес лӱман) 25 ий дояркылан тыршен, варажым тӱвыра пӧртыш кочегарлан пашаш пурен, пенсийыш лекмыж марте ты сомылымак шуктен. Маргарита Ивановнан пелашыже але пенсийыш лектын огыл, Москош коштеш. Тушто трактористлан пашам ышта. А Павел эргышт Йошкар-Олаште программистлан тунемеш.
Рашемдышым: Маргарита Ивановнан шочмо акажын эргыжат кызыт СВО-што служитла. Акаже ты тӱням коден каен, сандене тукым шольыжо Маргарита Ивановна деке миен эҥерта да йыҥгырта.
Сӧрастарышыже шуко
Кузнецовмыт чапле кермыч пӧртым чоҥен шынденыт. А пӧрткӧргышт мотор пеледыш да сылне тӱр дене волгалтеш.
Пӧртыш пурымеке, кок йӱксым да йырже пеледышым тӱрлеман ковёрым ужна. Моторын койшо ты тӱрым эше икмыняр ий ончычак тӱрленам мане. Омсалондем ӱмбалнат алмазный мозаике дене ыштыме кок йӱксӧ йылгыжеш ыле.
Диваным крючок дене пидме тыртышла дене волгалтарыме. Варажым Маргарита Ивановна тӱрлеман юмысолыкым, оҥеш сакыме ший аршашым, шерым, шӱешпидышым, шиян ӱштым да моло сӧрастарышымат ончыктыш. Кышкывий да шер дене сылнештарыме шӱэшпидышыжымат тӱрлым да ятырым келыштарен.
Шуктымо кидпашаж нерген озавате тыгерак каласыш:
– Мый изи годсек тӱрлем, гладь денат, ырес денат. Тӱҥ шотышто солыкым, тувырым тӱрлем. Кок кугу ковёрым ыштен, пӧрт пырдыжыш сакенам. Ик жап крючок дене диван, кресле ӱмбаке пышташ тӱрлӧ кугытан да форман шартышым, сеткым, тапычкым, модышым пидым.
Тӱржым ласкан тӱрлен шинчаш лиеш, сандене чонемлан утларак келша. Тӱвыра пӧрт пеленысе ансамбльыш коштшо-влакынат заказыштым шуктем. Нунылан шуко ший тарманым ыштылынам. А шкеже ӱдыр годсекак мурышо да куштышо коллективыш коштам.
Шке ыштыме вургемым чиен шогалше кажне марий ӱдырамашым чот уста еҥлан шотлыман. М.И.Кузнецоват шкаланже йытыра марий тувырым, ончылшовычым ямдылен. Фотокартычкыште лач туддене ужыда.
Авторын фотожо-влак.
