Йошкар-Олаште тиде ик эн кужу – 5,3 меҥге – урем. Тудо олашке Кугу Отечественный сар годым эвакуироватлыме предприятий-влак воктене шочын. 1948 ийыште уремлан Российысе революционер, совет военачальник, кугыжаныш да партий пашаеҥ, Совет Ушемын ик эн ончычсо маршалже Клемент Ворошиловын лӱмжым пуэныт.
1957 ий годсек Машиностроитель урем маналтеш, сар да тыныс жапыште Йошкар-Олалан чапым пуышо пашаеҥ-влак лӱмеш пуымо. Тыште олан кугу промышленный производствыжо-влак верланеныт: тиде 297-ше ден 298-ше номеран завод-шамыч, кызыт – Марий машиностроительный завод да Полупроводниковый прибор-влак завод.
1994 ийыште Йошкар-Ола администрацийым вуйлатышын пунчалже почеш Машиностроитель урем деке Рабочий уремым (ондакысе Рабочий посёлко) ушеныт. Кызыт тиде Машиностроитель уремын Медведево посёлко могырышкыла шуйнышо ужашыже.