Кок ий ончыч машинам кид гыч налынам. Ынде тудым ужалынем. Налогым тӱлыман мо?
И.Зверев.
У Торъял район.
Налог шотышто федеральный службын Марий Эл Республикысе инспекцийже умылтара:
– Машинам ужалыме годым тудын мыняр ий собственностьышто лиймыжым да могай ак дене ужалымым шотыш налман.
Машинам 250 тӱжем теҥге деч шулдынрак ужалыме гын, собственностьышто мыняр жап лийме шотыш ок налалт. Тыгай годым декларацийым пуыман огыл, ужалыме гыч налогат огеш тӱлалт.
Машинам 250 тӱжем теҥге деч шергынрак ужалыме гын, собственностьышто кум ий деч шагал лийме годым декларацийым пуыман. А ужалыме гыч налогым тӱлыман але уке – машинам могай ак дене налме деч шога. Шергынрак налында улмаш да шулдынрак але тыгаяк ак дене ужаледа гын, налог огеш шотлалт. Шулдынрак налында да шергынрак ужаледа гын, налогым ойыртем гыч тӱлыман.