25 июльышто Марий Эл Республикысе Кугыжаныш Погынын Председательже А.Смирнов, тудын икымше алмаштышыже В.Мухин, республикысе законодательный орган аппаратын пашаеҥже-влак «Сердце матери» толкынын волонтёржо-влак дене вашлийыныт.
Волонтёр-влак гуманитарный грузым погаш полшышо-влак нерген каласкаленыт. Нунын мутышт почеш, Марий Эл Правительстве, Йошкар-Оласе мэрий, мер организаций ден ушем-влак дене пырля паша шукталтеш. СВО-што улшо-влак дене волонтёр-влакын кылышт пеҥгыде. Йодмышт почеш гуманитарный полышым чумырат да кажныжлан намиен шуктат. Отпускыш толмеке, нуно «Сердце матери» толкынын офисышкыже пурен лектыт да тауштат.
СВО-што улшо-влаклан полышым пуымо шотышто Кугыжаныш Погынын коллективше республикысе «Сердце матери» организаций дене идалык наре кылым куча. Тиде ганат нуно «Град» реактивный батарей командирын йодмыжым шотыш налын, «Вашкеполыш» машиналан кӱлеш шапаш ужашым, запчастьым, арверым налын колтеныт.