Тений актрисе Надежда Четкарёван Марий самырык театрыш толмыжлан 20 ий темеш. Ты жапыште тудо 80 утла образым чоҥен. Рольжо-влак икте-весышт деч ойыртемалтыт. Тидыже актрисын талантшым тӱрлӧ могыр гыч почын пуаш полша.
Шернур район Потасола ялеш шочын-кушшо ӱдыр изиж годым артист койышан лийын. Варажым ешышт пошкудо Ӱлыл Рушэҥер ялыш илаш куснен. Тусо клубышто Марий самырык театрын концертшым ончен. Тунам сценыште у театр почылтмо нерген ойленыт, тидлан Йошкар-Олаште туныктат да театрышке толаш лиеш маныныт. Тидыже самырык ӱдырым артистлан тунемаш каяш кумылаҥден.
Н.Четкарёва И.С.Палантай лӱмеш тӱвыра да сымыктыш колледжын театральный пӧлкажым 2001 ийыште тунем пытарен да Марий самырык театрыш толын.
Роль шуко
«Надежда, могай роль утыр вий-куатым йодын?» – икымше йодышем лие.
«Артист кажне рольжо верч тургыжлана. Геннадий Гордеевын «Куп, але Кӱрышталтын йоҥга сӱан сем» спектакльыште пеш шуко монологан Сонян рольжылан эн шуко вий-куатым пуаш, чот шуко тунемаш, тыршаш логалын. Тиде премьер 2004 ийыште лийын. Репетиций годым шортынамат. А тылеч ончыч колледжыште тунемме годым «Театральное студенчество» фестиваль икымше гана лийын ыле. Тунам ме Николай Колядан пьесыж почеш «Мурлин Мурло» спектакльым ончыктышна. Тушто мый Мурлин Мурло манын лӱмдымӧ тӱҥ героиньым, окмакрак Ольгам, модынам. Ты рольыш пураш чот кугу кӧргӧ вий кӱлын», – вашештыш тудо.
Н.Четкарёван модмо рольжо-влак шуко да тӱрлӧ шӧрынан улыт. Режиссёрын ӱшанен пуымо кеч-могай рольым тудо мастарын ончыкташ тырша.
УМБАКЫЖЕ — «КУГАРНЯ»газетыште (2021 ий 12 март).