Марла мутланыше татар ӱдыр

Яллаште шочмо вершӧрым тӱзатыше, ончыко кайыше, марла сайын кутырышо чолга ӱдыр-рвезе-влакым вашлияш куанле. Нунын кокла гыч иктыже – Параньга район Кугу Пумарий селаште шочын-кушшо, марий да англичан йылмылам туныктышо татар ӱдыр Альфира Гаязова.

Альфира моло еҥ семын пашам кугу олаш кычал каен огыл, а ялышке пӧртылын. Тудо эн ончыч Лажмарий, варажым Марий Турек школлаште йот йылмым туныктен. Кызыт Кугу Пумарий школышто директорын туныктымо паша шотышто алмаштышыжлан ышта.

 

Тукымыштыжо – ятыр туныктышо

Кызыт марий ӱдыр-рвезе-влак шочмо йылме дене мутланаш вожылыт. Сандене Альфирам нунылан пример шотеш кондыман. Татарла моткоч сайын кутыра, тыгодым пошкудо марий-влакынат йӱлаштым, йылмыштым пагала да марла пелештен колта. Южгунамже палыдыме еҥ-влак Альфирам марий ӱдырланат шотлат. Ончыкылык профессийжымат тудо марий йылме дене кылден.

– Марий-влак воктене илымем дене нунын йылмыштлан шӱмаҥынам. Сандене изинек марла кутырен моштем. Школыштат ты предметым тыршен тунемынам, шке гыч шуко шинчылтынам.

Тукымыштем ятыр туныктышо уло. Мыйынат ты корно дене каяш кумылем лийын. Марий йылмым туныктышо лияш эре шоненам. Сандене школ деч вара МарГУ-шко тунемаш пурышым. Марий йылме дене сочиненийым возымем дене 95 баллым погенам, – мане Альфира.

Татар ӱдырын марий-влак коклаште тунеммыже южыжым ӧрыктарен гынат, шукын тудым порын вашлийыныт. Альфира моло студент семын лекцийыш, занятийыш куанен коштын. Вузышто тудо эше венгр йылмым тунемын. Венгрла сайын кутырен мошта.

Йот йылмым туныктен

Альфира Гаязова Марий Турек кыдалаш школышто англичан йылмым вич ий туныктен. Школыш тудо ондак автобус дене кудалыштын гын, варажым машинам виктараш тӱҥалын. Ты школ самырык туныктышылан профессионально мастарлыкым нӧлташ, опытым погаш кугун полшен.

– Кугу школышто класслаште 28 тунемше дене улыт ыле. Тыгодым туныктышо-влак моткоч виян улыт. Икоян коллективыште икте-весылан эре полшымо.

Мый 5-11-ше класслаште туныктенам. Йот йылмым туныктымаште тӱрлӧ йӧным кучылтынам. Ме видеопрезентацийым онченна, модынна, мероприятийым эртаренна. Урокышто англичанла гына кутыраш тыршенам. Тунемше-влак огыт умыло гын, урок деч вара мый декем толыт ыле, – ойла А.Гаязова.

Кугу Пумарий школышто

Кызыт Кугу Пумарий школышто 18 туныктышо ышта, 164 йоча тунемеш. Тунемше-влакым школ автобус Вочарма, Штрамарий почиҥга, Изи Пумарий почиҥга, Пумарий почиҥга, Марий Сеснур, Кугу почиҥга, Памашъял гыч шупшыкта. Школышто Альфира тыгак ИЗО ден технологийым туныкта.

– Школ вуйлатыше Вероника Ивановна Веселова ты пашаш ӱжӧ. Февраль гыч у коллективыш ушнышым. Тыште тӱрлӧ ийготан педагог-влак тыршат. Шукынжо мыйым туныктеныт.

Школым 1991 ийыште чоҥымо. Сандене вес ийын посна нацпроект почеш ачалыме пашам ыштышаш улыт. Школ спорт направлений дене ойыртемалтеш. Тунемше-влак ече дене коштмо, футболла, баскетболла модмо таҥасымаште эре ончыл верлам налыт. Тыгодым мураш, кушташ тале улыт. Нуно республикысе тӱрлӧ конкурсыш, мероприятийыш ушнат.

Мо кумылым волта: кызыт шуко марий йоча рушла мутлана. Нуным мый марла кутыраш кумылаҥдем. А южо икшыве шочмо йылме дене тыге лывыргын кутырен колта, чонланат сайын чучеш, – ойла А.Гаязова.

Вес ийын Альфиран эргыже 1-ше классыш кая. Самырык туныктышо икшывыж дене шинчылтеш, школлан ямдыла. Яра жапше годым йолташыж-влак дене вашлиеш, театрыш коштеш.

Ялысе пӱртӱс тудлан пеш келша, сандене ял гыч олаш каяш огеш шоно. Тыште пӱртӱсшат ямле, южшат яндар, чонланат ласка. Тыгодым ялысе школышто туныкташ келша. Вес ийын тудо руш, марий йылмылам вӱдаш тӱҥалеш. Туныктышын мутшо почеш, пашам йӧратет гын, тудо ушнен толеш.