Йочасад кодшо ийын 28 март гыч сентябрь марте пашам ыштен огыл, сандене выпускник-влакын пайремыштат лийын огыл. А кызыт тысе пашаеҥ ден ача-ава-шамыч выпускник-влаклан мероприятийым эртарыме нерген шонкалат.
Йочасадым ончен коштшыла, рашеме: тысе воспитатель-влак мастар улыт. Нуно туныктымаште, тӱрлӧ спектакльым ончыктымаште кучылташ арвер-влакым шкеак ямдыленыт, тӱрлӧ янлыкын, йомакысе персонажын вуйчиемыштым пидыныт. Тыгак ача-ава-влакымат шке икшывышт дене пырля тӱрлӧ кидпашам ышташ кумылаҥден моштат. Арвер-влакым варажым пашаеҥ-влак ончерышке чумырат.
Маргарита Андреевна Марий Турек район Ӱлыл Турек ялеш шочын. Марпединститутысо физкультур факультетым тунем пытарен, ече дене спорт мастер. Вуз деч вара марлан лектын. Пелашыжым, Александр Александровичым, Токтайбеляк школыш труд ден черчений предметлам туныкташ колтеныт. Физкультур дене туныктышылан школышто вер лийын огыл, сандене йочасадыш каен. А 31 ияшыж годым М.А.Шибанаевалан йочасадым вуйлаташ ӱшаненыт.
Ты кундемыште марла мутланыше самырык ача-ава шагал гынат, кажне пайремын репертуарышкыже марий куштымашым але мурым, почеламутым пуртат. Тидлан икшыве-шамычым воспитатель-влак Наталья Александровна Иванова ден Галина Борисовна Каменщикова кумылаҥдат. Галина Борисовна руш гынат, марла мошта да йоча-шамычым уло кумылын туныкта. Музыкальный вуйлатыше Валентина Николаевна Актуганова пел ставкыште пашам ышта.
Кызыт кок группыш 42 йоча коштеш. Чылаже нунын дене лу еҥ пашам ышта. 2009 ийыште у йӧнлан келыштарыме верыш, школын ончычсо интернатышкыже, кусарыме. Тылеч вара тудо тӱрлӧ нормылан келшен толшо, кок пачашыште верланыше икмыняр волгыдо пӧлеман йоча тӧнежыш савырнен. Йоча-шамычланат тыште йывыртат: идалык пелаш гыч тӱҥалын школыш кайыме ийготышт марте марте нуным тӱрлӧ пашалан туныктат. Тений йочасадыш коштшо шым йочам школыш ужатышаш улыт.
Эльвира Терентьева.
Снимкылаште: М.А.Шибанаева дене мутланыме годым;
«Березка» йочасадлан «Кугарня» газет редакций деч изирак пӧлекым пуымо годым.