21 декабрьыште Курчак театрыште Марий тӱвыра рӱдер «У ий йомак» марий пайремым эртарен.
Тушко кундемнан тӱрлӧ районжо гыч 200 утла чолга, уста, тӱрлӧ аланыште сеҥымашыш шушо марий ӱдыр-рвезе-влак погыненыт. Нунын коклаште тыгак СВО-што улшо боецын шочшышт, тулык икшыве-влакат лийыныт.
Йоча-влак пайремыш куанен, йывыртен толыныт. Марий тувырым чиен, кож йыр пӧрдыныт. Нуным йомакысе персонаж-влак тӱрлӧ семын куандареныт: туштым туштеныт, модыктеныт, мураш-кушташ ӱжыныт. Варажым Йӱштӧ Кугыза ден Лумӱдыр поро шомакышт дене йоча кумылым нӧлтеныт, кожым пырля волгалтареныт. Кажне икшывылан чапле шере пӧлекым кучыктымо.
У ий вашеш Марий тӱвыра рӱдер йоча-влаклан кум конкурсым эртарен: «Колышт, Йӱштӧ Кугыза…» почеламутым серыме, СВО-н участникше-шамычлан «У ий дене» видеосаламлымашым войзымо, «Йӱштӧ Кугызалан серыш». Ты кечын тушто сеҥыше-влакым палемдыме. Тиддеч вара йоча-влаклан «Аленький цветочек» спектакльым ончыктымо.
Пайрем нерген Марий тӱвыра рӱдерым жаплан вуйлатыше В.Г.Петров (снимкыште) тыгерак мане:
– Марий тӱвыра рӱдер негызлалтме жап гычак марий ёлко пайремым эртарена. Тиде поро йӱлаш пурен. Тӱҥ шотышто ме тале, марий шӱлышан, марий йылмым, литературым сайын палыше талантан ӱдыр-рвезе-влакым тышке погена. Кажне ийын нуным куандараш тыршена, мом-гынат ум пуртена. Тений сценарий ойыртемалтше, пеш виян ыле, молан манаш гын тыште профессионал-влак тыршеныт. Марий тӱвыра рӱдерын пашаеҥже, тыгак артист-шамыч модыныт.
Икманаш, тиде мероприятий дене ме тенийысе пашанам мучашлена.
Пайремыш Медведево район Шойбулак школ гыч ныл тунемше: М.Карпова, А.Николаева, Г.Соловьев, Е.Лебедева – толын. Нуным школын педагог-организаторжо, музыкым туныктышо Т.Д.Волкова конден.
– Нине икшыве-влак пеш чолга, мураш йӧратыше, сӱретлен моштышо улыт, тыгодым сайын тунемыт. Икмынярынже тышке икымше гана толыныт. Пеленышт марий тувырым конденыт. Ёлко моткоч келшен. Толмемлан куаненам веле, – мане тудо.
Марий ёлкышто марий шӱлыш озаланен. Сандене тыгай пайрем кӱлешан. Йоча-влакым марла мутланаш, шочмо калык дене кугешнаш кумылаҥда.
