Марий лӱман улам
Поэтессе да мер пашаеҥ Раисия Сунгурова ден пелашыжын икшывышт марий лӱман улыт. Кугурак эргыже Марис, ӱдыржӧ Илавий, а кумшо икшыве Аксар лӱман улыт. Икшыве-влаклан марий лӱмым пуымо шотышто Раисия тыгерак палдарыш:
– Марий лӱм-влак эреак сымыстареныт. Эше студент улмем годымак марий лӱм-влак мутерыште шканем ик лӱмым йӧратен палемденам. Тунам, илен- толын, ешым чумырымеке, эргым шочеш гын, тудлан Марис лӱмым пуэм манын шоналтенам. Тыгак лийын. Мыйын да пелашемын ешыштына кугезе коча-кована-влак чылт марий лӱман лийыныт.
Марис чын верч кучедалше шонымашым нумалеш. Тыгай лӱман рвезе-влак пеҥгыде, спортлан шӱман улыт. Кокымшо икшывынам Илавий манын лӱмденна. Мурызо Александр Речкинын йоҥгалтарыме «Илавий» мурыжо чоныш возын, келшен. Эстонийыште илыше ик палыме еҥын ойлымыж почеш, Илавий лӱмым англичан йылмыште, транскрипций гоч ончыкташ гын, «Мый тыйым йӧратем» манын ойлымо лектеш. А вет чынжымак, «ила – илыш» да «вий» манмыже лачак йӧратымаш нерген ойла. Аксар лӱм пелашемлан пеш келша. Икымше эргына шочмо годымак Аксар да Марис лӱм-влак коклаште кокытеланен. Тунам мыйын шонымем дене келшен гын, ты гана тудо лӱмым пуэн. Аксар ӱшан манме шонымашым нумалеш. Тыгай айдемылан чон почын ӱшанаш лиеш. Тудо нигунам огеш ондале, кӱлеш годым полыш кидым шуялташ эре ямде.
Еш альбом гыч налме фото.