Ял гыч Йошкар-Олашке шукертак илаш кусненна. Икана корным вончымо годым тупем ала-кӧ пералтымыла чучо. Шеҥгекем ончальым – иктат уке. Тиде кӱжгӧ ӱдырамаш шижде-годде пералтыш манын шоналтышым.
Вес кечын паша деч вара ватем кевытыш пураш йодо. Марина ӱдырнан смесьше пытен, манын. Черетыште шогымо годым вачем адак пералтыме гай чучо. Савырнен ончальым – шем кужу ӱпан ӱдырамаш шога. Вара, вуйжым пылышем дек конден, «Сита мыланем омышто кончаш. Мый чыла палем. Кидыштет пикшызан татуировкет уло, тый вет ноябрьыште шочынат» манын, шып пелештыш.
Кевыт гыч лекмекем, кушеч мыйым палымыжым йодам, шонем. Тошкалтышым волен веле шуктышым, сайын гына камвозым. Саде ӱдырамаш вуйышкем ала-молан толын перныш. Вучем манын шоналтышым, но… кевыт гыч ик пӧръеҥ веле лекте.
Ик-кок кече гыч командировко дене районыш лекташ перныш. Машина дене кудалам, да кенета корно покшелне шем вургемым чийыше шем кужу ӱпан ӱдырамаш ала-кушеч лекте. Рульым пӱтыркален, трукышто чарнен шогальым. Иктат уке.
Вӱдым налаш изи ялысе кевытыш пуренам. Мо лиймым кевытчылан пешак каласкалем. А тудо вашешта: «Тиде тыйым, очыни, Рита-Маргарита авырыш. Тудын марийже ноябрьыште колен. А тый тудын гай коят. Кидыштет, ончо, пикшызан татуировкетат уло. Тудо тюрьмаште шинчымыж годым ыштыктен ыле. Тольык пурла кидыште, а тыйын – шолаште». Тугеже Рита-Маргарита кугу олаште марийжым кычалеш манын шоналтышым.
МИХАИЛ.
Йошкар-Ола.