14-16 декабрьыште Ханты-Мансийск олаште «Финн-угор студенчествын миссше-2023» конкурс эртаралтеш. Тушко финн-угор калык-влакын 9 ӱдырышт ушнен.
Марий калыкын чапшым ты гана МарГУ-што «Тӱнямбал кыл» направлений дене тунемше 20 ияш Наталья Васильева арала. Ӱдыр Йошкар-Олаште шочын-кушкын, 30-шо номеран школым тунем пытарен.
Н.Васильевалан эн ончыч тыште кастингым эрташ кӱлын: шке нерген оҥайын каласкалаш да марий тематикан усталык номерым ончыкташ. Наташа мураш йӧрата. Эше кум ияш йочам ача-аваже тазалыкше начарлан кӧра мураш тунемаш колтеныт. Сандене кызыт марте тудо вокал конкурсышто вич гана Гран-прим сеҥен налын, Российысе да тӱнямбал таҥасымашлаште лауреат лӱмым сулен. Университетын чапшым Российсе «Студшошо-2023» конкурсышто арален да кок номинацийыште сеҥышыш лектын.
Васильевмыт ешыште чыланат усталык шӱлышан улыт. Аваже музыкальный школышто скрипкым шоктен. Ачаже синтезатор, гармонь да гитар дене семым шке семынак лукташ тунемын. Ачаж велым чылаштын гаяк музыкальный слухышт уло, Павел шольыжат семӱзгар-влак дене шокташ мастар. Натальян коваже Ольга Егоровна мураш йӧрата, сылне йӱкшӧ дене йоҥгалтара. А самырык ӱдыр ятыр кеҥежым лач нунын дене Морко район Кокласолаште эртара.
Конкурсышто Наташа мурызо Алёна Яковлеван «Корно» мурыжым мура. Сем тӱняште шкем тергыме деч посна ӱдыр спорт дене кылым куча, тренажёр залышке коштеш. Тыгак МарГУ-со Тӱвыра да усталык паша шотышто рӱдерым вуйлатыше Яна Семёнова дене пырля сӱан да моло мероприятийым вӱда.
Эльвира Терентьева.
Фотом Н.Васильеван альбомжо гыч налме.