Ожно чыла марий ешыште марий вургем лийын. Тидыже калыкнан тӱвыраж ден историйже, йӱлаж ден илыш ойыртемже нерген почын пуэн кертеш. Пытартыш жапыште тидым утларак шымлаш тӱҥалме. Тыгак у жаплан келшыше вургемымат ыштен чият, ожнысымат уэмдат.
Теве 28 мартыште Свердловск область Арти район Кӱшыл Пардым ялысе библиотеке-клубышто «Марий вургем пайрем унала ÿжеш» мероприятий эртаралтын.
Тушко Арти ола шотан илемыште илыше марий-влакын национально-культурный автономийыштым вуйлатыше Семён Ильин ден ты мер организацийын чолга еҥже Людмила Шалкиева миеныт. Нуно тиде мероприятийысе участник-шамычым саламленыт веле огыл…
Эн ончыч библиотекарь Ольга Яниева ден ялыште илыше шоҥгыеҥ-влак марий вургемым ышташ тӱҥалме нерген каласкаленыт. Нуно вургемысе кажне тамгам, ужашым тыглай гына келыштарыме огыл, а посна радам дене шотыш кондымо, аралтыш семынат акленыт, маныныт.
Тӱрлӧ жапысе марий вургемын дефилежым сценыште самырык волонтёр-шамыч ончыктеныт. Тушто тӱҥ шотышто Арти кундемысе ӱдырамаш ден пӧръеҥ-влакын тӱрлӧ марий тувырышт, тыгак шовыр, ончылсакыш да молат лийыныт.
Варажым сценыште Кӱркеде села гыч толшо «Муро памаш» ансамбль муралтен. Тусо участник-шамычат тӱрлӧ сынан марий вургемым чиен лекмышт дене тудын ойыртемжым да моторлыкшым ончыктеныт.
«Марий курчак» ончер-экспозицийыште опытан кидмастар Людмила Шалкиеван да Кӱшыл Пардым ялыште илыше-влакын ыштыме мотор курчакыштым ончыктымо. Тыгак ончерыште Нина Иванован гладь да ырес дене тӱрлымӧ марий тӱржӧ-влакым ужаш лийын. Кидмастар-шамычлан толшо-влак кугу акым пуэныт. Чынак, южгунамже изи пачката курчакыште вургемна эшеат сӧралынла чучеш.
Мучашлан Арти йоча книгагудын библиотекарьже-влак «Марий орнамент ден узор» мастер-классым эртареныт. Тушто чыла кумылан еҥ марий тӱран брелок-аралтышым ыштен.
Эльвира Терентьева.