Кызыт 14-18 ноябрьыште Турцийыште, Стамбулышто, «Миссис Европа-2023» тӱнямбал конкурсышто марий ӱдыр шке мастарлыкшым ончыкта.
Удмуртийысе Карагӧл район Пыргынде ялыште шочшо марий ӱдырамаш шке республикын, марий калыкын да шке тукымжын чапшым волгалтара.
Тений июньышто 37 ияш Светлана Котлова «Миссис Россия-2023» конкурсышто мастарлыкшым терген. Жюри тудым «Достояние России» номинацийыште палемден. Тылеч ончыч тудо «Миссис Удмуртия-2023 Charity» титулым сулен. Кызыт марий ӱдырамаш «Миссис Европа-2023» конкурслан ямдылалтеш.
Молан тыгай корно?
Шкеж нерген Светлана тыгерак каласкалыш:
– Мый марий тукымын шочшыжо улам. Сценыште мастарлыкым ончыктымаште ковам да кугезе ковам полшат манын шонем. Вет мый тукым гыч тукымыш куснылшо 300 ияш ший аршашым оҥышкем сакем. Тукымысо ӱдырамаш-влак шуженат, кылменат иленыт, сар жапымат эртеныт, но тиде шийым арален коден кертыныт.
Астропсихолог, биоэнерготерапевт семын палем: кажныжын шке корныжо уло, да мый тудым муаш, талантыштым почаш еҥ-влаклан полшем. Южгунамже нуно тидым шекланенат огыт шукто. Вий-куатем шуко, сандене еҥ-влакын чын тӱсыштым ужаш, нунылан шинчымашым пуаш тыршем – тыге чон шокшылыкым да волгыдылыкым да илышыштым вашталташ лийме шонымашым намиен шуктем.
Йӧратыме ойсавыртышем – лийын кертдымаш лийын кертеш! Кунам айдеме ала-мом моткочак ыштынеже, тидлан Сандалык полша. Туддеч чын йодын мошташ да тӱткын колышташ кӱлеш. Вет ала-кунам Сандалык ялысе изи ӱдырын йӱкшым колын. Тунам ачам дене пазарыште ужалаш полшымо шот дене шогылтмо годым пошкудо киоскышто ужалалтше сымыстарыше мотор курчакым онченам да ала-кунам мыят тудын гаяк чевер лиям манын шонкаленам. Теве ынде тиде шонымашем шукталтын: сӧрал тувыр дене мотор, сеҥымашлам эртыше да шкалан ӱшаныше ӱдырамаш улам. Ӱдырамаш веле огыл, 2022 ий декабрьыште кова лийынам.
УМБАКЫЖЕ — 10 ноябрьысе номерыште лудса.