Провой кундем Ӱлыл Памъялыште шочшо да кызыт туштак илыше В.В.Степанов могай гына профессийлан шинчымашым налын огыл?! Кужмара кыдалаш школым тунем лекмеке, Морко СПТУ-што автослесарьлан тунемын, армий марте Звенигово АТП-ште пашам ыштен да ДОСААФ-ыште радиотелеграфист профессий дене палыме лийын.
Василий Украинысе Чернигов областьысе Прилуки олаште служитлен. Авиабазысе ТУ-16 самолётышто огневой установко командир (стрелок-радист) лийын. Армий деч вара Звенигово олаште утарыше станцийым вуйлатыше, таза капкылан, лопка тупвачан рвезым ужынат, водолазлан ӱжын. Самырык еҥлан неле пашам ӱшаненыт, сандене тудо эре айык лийын да вӱдыш пуреҥгайыше-влак деч лӱдын огыл.
Тений январьыште В.В.Степанов 70 ийым темен. 2008 ий годсек тудо Звениговысо аварийно-утарыше группын утарышыже сомылым шукта. Шке пашаж нерген самырык-влаклан каласкала, водолаз чын пӧръеҥ манын умылтара. Шочмо ялже гыч вич еҥым ты пашалан кумылаҥден. Иктыже – Валерий эргыже – Архангельск областьыште «Северный поток» газопроводым шупшмаште лийын. Евгений Гавриловлан «Булгария» теплоходым лукташ полшымыжлан медальым кучыктеныт. Кумытынжо «Волжский подводник» ОАО-шо водолазлан тыршат.
Тичмаш материалым «Кугарня» газетын 6-шо майыште лекше номерыштыже лудса.