27 январьыште Санкт-Петербургышто да Ленинград областьыште илыше марий-влак Ленинградым фашист блокаде деч утарымылан 79 ий темме лӱмеш церемонийыш ушненыт.
Ленинград областьысе «Ший корно» Калыкле национально-культурный автономийын еҥже-влак Санкт-Петербургысо Национальность-влак пӧрт гыч моло национальный мер организацийла дене пырля ик колоннышто ошкылыныт. Варажым участник-шамыч Пискарёвысе мемориал шӱгарлаште пеледышым пыштеныт. Тыгак Шарнымаш аллейыште лийыныт. Тушто Марий Элыште шочшо да Ленинград кундемым аралышыла вуйым пыштыше-влаклан 2020 ийыште мемориал плитам келыштарыме.
Пискарёвысе мемориал шӱгарлаште Марий АССР-ын 134 салтакшым тойымо. Кугу Отечественный сар жапыште Йӱдвел рӱдолана верч 4000 утла землякна кредалын.
