Тюменьыште марий-влакын национально-культурный автономийышт кудымшо ий пашам ышта.
Автономийын чолга участникше-влак Тюменьысе ныл йочасадыште Марий кундемын кечыжым эртареныт, йоча-влакым марла чиктеныт, пырля муреныт, куштеныт, марий модышла дене модыныт.
А тылеч ончыч Тюменьысе марий-влакын национально-культурный автономийыштын «Кече» ансамбльыш коштшо Алина Мальцева (М.Меньших вуйлата) Марий Эл нерген каласкалымыж дене икымше верым налын.
30 ноябрьыште «Чолга шӱдыр» ансамбль «Свадебный переполох» конкурсышто сӱаным ончыктымыж дене кумшо верыш лектын. Тиде коллектив Транспорт технологий ден сервис колледжыште ныл ий шке мастарлыкшым ончыкта. Ансамбльым Никита Байдуганов вуйлата. Тудо йочаж годсек марий коллективыш коштеш, ачаже тӱмырым перкала.